Samarqandda 2 gektar yer uchun 490 ming dollar talab qilingan holat fosh etildi
Samarqandda 2 gektar yer maydonini 490 ming dollarga noqonuniy sotishga uringan shaxslar qo‘lga olindi. Gumonlanuvchilar kelishilgan summaning 50 ming dollarini bo‘nak sifatida olayotgan vaqtda huquq-tartibot idoralari tomonidan ashyoviy dalillar bilan ushlangan. Hozirda mazkur holat yuzasidan ikki nafar fuqaroga nisbatan jinoyat ishi qo‘zg‘atilib, tergov harakatlari olib borilmoqda. Mutaxassislar yer maydonlari faqat “E-AUKSION” platformasi orqali qonuniy sotilishini yana bir bor eslatib o‘tishdi.
Samarqand shahrida yer maydonini noqonuniy tarzda sotishga urinish bilan bogʻliq holat fosh etildi.
Maʼlumotlarga koʻra, 1993 yilda tugʻilgan shaxs boshqa bir fuqaro bilan kelishgan holda 2 gektar yer maydonini xaridorga 490 ming AQSH dollariga sotishni vaʼda qilgan.
Ular ushbu yer maydonini mansabdor tanishlari orqali rasmiylashtirib berishini aytgan holda, oldindan 50 ming dollar talab qilgan.
Davlat xavfsizlik xizmati, Ichki ishlar va boshqa idoralar hamkorligida oʻtkazilgan tezkor tadbir davomida gumonlanuvchi 50 ming dollar pulni olayotgan vaqtda ashyoviy dalillar bilan qoʻlga olingan.
Hozirda ushbu holat yuzasidan ikki nafar shaxsga nisbatan jinoyat ishi qoʻzgʻatilib, tergov harakatlari olib borilmoqda.
Mutaxassislar yer uchastkalarini sotish va ajratish faqat “E-AUKSION” elektron platformasi orqali qonuniy tarzda amalga oshirilishini eslatmoqda.
Izohlar 0
…