AQShning "Meta" texnologik kompaniyasi o'z xodimlarining qariyb 10 foizini yoki 8 ming kishini ishdan bo'shatish niyatida ekanini ma'lum qildi. "Facebook", "Instagram" va "WhatsApp" ijtimoiy tarmoqlari egasi bo'lgan korporatsiyaning ushbu qarori sun'iy intellekt texnologiyalariga kiritilayotgan yirik investitsiyalar bilan bog'liq. Bu haqda Bbc.com xabar beradi.
Kompaniya rahbariyati xodimlarga rejalashtirilgan qisqartirishlar haqida xabar bergan. Shuningdek, avvalroq ishga qabul qilish ko'zda tutilgan bir necha mingta vakansiya ham bekor qilinadigan bo'ldi. Qisqartirishlarning asosiy sababi sifatida sun'iy intellektni rivojlantirish uchun sarflanayotgan ulkan mablag'lar ko'rsatilmoqda. Faqat joriy yilning o'zida ushbu sohaga 135 mlrd dollar sarflash rejalashtirilgan.
Kompaniya asoschisi Mark Sukerberg sun'iy intellekt xodimlarning ish unumdorligini oshirishga yordam berganini ta'kidladi. Uning so'zlariga ko'ra, endilikda bir kishi ilgari katta jamoa talab qilingan loyihalarni amalga oshirishi mumkin. Sukerberg 2026 yil sun'iy intellekt ish jarayonlarini tubdan o'zgartiradigan davr bo'lishini bashorat qilmoqda.
Ma'lumot uchun, 2022 yildan buyon "Meta" o'n minglab xodimlarini bo'shatib kelmoqda. Texnologiya sohasidagi boshqa gigantlar ham shunday yo'l tutmoqda. Xususan, "Amazon" 30 mingdan ortiq, "Oracle" esa 10 mingdan ziyod xodimini qisqartirgan. "Microsoft" kompaniyasi ham uzoq yillik tajribaga ega xodimlarga to'lovlar evaziga o'z xohishi bilan ishdan ketishni taklif qilgan.
“Zamin”ni Telegramʻda oʻqing!
