Poytaxtda keksalar hayot sifatini oshirish bo'yicha yangi tizim joriy etiladi
Toshkentda keksalar hayot sifatini yaxshilash va faol uzoq umr ko‘rish madaniyatini rivojlantirishga qaratilgan Gerontologiya va uzoq umr ko‘rish markazi ish boshladi. Milliy ijtimoiy himoya agentligi ko‘magida tashkil etilgan ushbu muassasa soha mutaxassislarini tayyorlash, ilmiy tadqiqotlar o‘tkazish va ijtimoiy dasturlarni joriy etish bilan shug‘ullanadi. Markaz negizida zamonaviy ta’lim texnologiyalari qo‘llanilib, 2026-2027 o‘quv yilidan boshlab bakalavriat va magistratura yo‘nalishlarida yangi kadrlar tayyorlash tizimi yo‘lga qo‘yilishi rejalashtirilgan.
Toshkentda Gerontologiya va uzoq umr ko'rish markazi o'z faoliyatini boshladi. Ushbu yangi maydon katta yoshdagi avlod vakillari uchun ta'lim va ijtimoiy dasturlar ishlab chiqish, ularning hayot sifatini yaxshilash hamda faol uzoq umr ko'rish madaniyatini rivojlantirish bilan shug'ullanadi. Bu haqda Podrobno.uz xabar beradi.
Markaz faoliyatining asosiy yo'nalishlaridan biri soha mutaxassislarini tayyorlash, zamonaviy ta'lim yondashuvlarini amaliyotga tatbiq etish va gerontologiya sohasida ilmiy tadqiqotlarni kengaytirishdan iborat. Loyiha O'zbekiston prezidenti huzuridagi Milliy ijtimoiy himoya agentligi ko'magida Gersen nomidagi Rossiya davlat pedagogika universitetining Toshkent filialida tashkil etildi.
Hozirda muassasada o'ndan ortiq bo'linma, jumladan, axborot va ta'lim texnologiyalarini rivojlantirish instituti hamda gerontologik materiallar fondi faoliyat yuritmoqda. Universitet Sankt-Peterburgning yetakchi ilmiy markazlari bilan hamkorlikni yo'lga qo'ygan.
Shu bilan birga, filial 2026–2027 o'quv yilidan boshlab ta'lim yo'nalishlarini kengaytirishni rejalashtirmoqda. Bakalavriatda texnologik ta'lim, xorijiy tillar, adaptiv sport, sun'iy intellekt va reklama yo'nalishlari ochiladi. Magistraturada esa imkoniyati cheklangan shaxslarni reabilitatsiya qilish va ta'lim sifatini boshqarish bo'yicha kadrlar tayyorlanadi.
Izohlar 0
…