Toshkent shahrida taniqli tovar belgilari ostida qalbaki maishiy kimyo vositalarini sotish holatlari fosh etildi. Bu haqda Adliya vazirligi matbuot xizmati ma'lumot berdi. Tekshiruvlarga «KROT» tozalash vositalari brendi egasi hisoblangan «Sano Technology» kompaniyasining murojaati asos bo'lgan. Bu haqda Uzdaily.uz xabar beradi.
Huquq egasining ma'lum qilishicha, poytaxt bozorlarida original mahsulotga o'xshash va iste'molchilarni chalg'ituvchi tovarlar sotuvga chiqarilgan. Adliya vazirligi huzuridagi Intellektual mulk markazi xodimlari Toshkentdagi savdo nuqtalarida o'tkazgan o'rganishlar davomida oltita joyda qalbaki mahsulotlar sotilayotganini tasdiqladi.
Nazorat tadbirlari yakuniga ko'ra, barcha qoidabuzarlarga nisbatan Ma'muriy javobgarlik to'g'risidagi kodeksning 177-moddasi (tovar belgisidan qonunsiz foydalanish) bilan bayonnomalar rasmiylashtirildi. To'plangan hujjatlar ko'rib chiqish uchun sudga yuborildi.
Sud qarori bilan har bir huquqbuzar kompaniyaga bazaviy hisoblash miqdorining 15 baravari, ya'ni 6,18 mln so'm miqdorida jarima tayinlandi. Shuningdek, tadbirkorlarga aniqlangan qonunbuzilish holatlarini bartaraf etish majburiyati yuklandi. Vazirlik bu kabi choralar bozorda kontrafakt tarqalishining oldini olishga xizmat qilishini ta'kidladi.
“Zamin”ni Telegramʻda oʻqing!
