Qoʻqon va Bekobod shaharlarida oʻtkazilgan tezkor tadbirlar davomida tamaki va alkogol mahsulotlarining noqonuniy savdosi holatlari aniqlandi.
Bosh prokuratura huzuridagi Departament maʼlumotiga koʻra, Qoʻqonda tadbirkor oʻz doʻkonida aksiz markasisiz tamaki mahsulotlarini hamda xorijda ishlab chiqarilgan elektron sigaretalarni sotuvga qoʻygani fosh etilgan.
Tekshiruv natijasida umumiy qiymati 288,2 million soʻm boʻlgan 14 mingdan ortiq qutti tamaki mahsulotlari aniqlanib, musodara qilingan.
Bekobod shahrida esa MCHJ rahbari savdo nuqtasida qalbaki aksiz markali alkogol mahsulotlari va hujjatlarsiz tamaki mahsulotlarini sotgani maʼlum boʻlgan.
Bu yerda 619 dona alkogol mahsuloti hamda 1 200 dan ziyod qutti tamaki mahsuloti noqonuniy ravishda savdoga chiqarilgani qayd etilgan.
Har ikki holat boʻyicha mahsulotlar ashyoviy dalil sifatida olib qoʻyilgan va tegishli moddalar asosida jinoyat ishlari qoʻzgʻatilib, tergov jarayonlari olib borilmoqda.
“Zamin”ni Telegramʻda oʻqing!
