Fitch Ratings agentligiga ko'ra, yaqin kelajakda O'zbekistonda davlat banklarini keng ko'lamda xususiylashtirish amalga oshishi kutilmayapti. Ushbu xulosa tashkilotning rasmiy hisobotida e'lon qilingan.
"Biz davlat banklarining biznes-modellarini o'zgartirish jarayoni sekin kechayotgani, hamda sodiqlik dasturlari doirasida berilgan kreditlar ulushi yuqori ekani sababli yaqin kelajakda keng ko'lamli xususiylashtirishni kutmayapmiz. Bunday kreditlar banklarning faoliyat natijalariga salbiy ta'sir qilmoqda", deya qayd etilgan hisobotda.
Fitchning fikricha, davlat banklarining biznes-modellarini transformatsiya qilish ularning korporativ boshqaruvini yaxshilab, foyda va operatsion samaradorlikni oshiradi. Ushbu chora-tadbirlar xorijiy investorlarni jalb qilishga ham yordam beradi.
Shu bilan birga, O'zbekistonning qayta ko'rib chiqilgan banklarni xususiylashtirish dasturi selektiv yondashuvni tanlaganini ko'rsatmoqda. Hozirgi e'tibor "O'zpromstroybank"ni xususiylashtirishga qaratilgan.
Bankni transformatsiya qilishda O'zbekiston Milliy investitsiya jamg'armasi muhim rol o'ynamoqda. Mazkur jamg'arma bankni xususiylashtirishga tayyorlash jarayonini qo'llab-quvvatlab, o'rta muddatli istiqbolda muvaffaqiyatli xususiylashtirishga zamin yaratmoqda.
Fitch agentligining qayd etishicha, 2025-yil oktabr oyida "O'zpromstroybank" tomonidan 300 million dollarlik obligatsiyalar chiqarilishi bankning kapital bazasini mustahkamladi. Agentlik prognoziga ko'ra, bankning xususiylashtirilishi 2026-yilda jamg'armaning IPOga chiqishidan so'ng amalga oshadi.
"O'zpromstroybank"ning nazorat paketi muvaffaqiyatli sotilishi "Asakabank" va "Aloqabank" kabi boshqa davlat banklari uchun namuna bo'lishi mumkin.
Mehmon guruhidagi foydalanuvchilar ushbu nashrga izoh qoldira olmaydi.
