2025 yil iyun oyida Fitch Ratings reyting agentligi O‘zbekiston banklari uchun operatsion muhit bo‘yicha prognozini "barqaror" darajadan "ijobiy" darajaga ko‘tardi va "b" darajasidagi bahoni tasdiqladi. Fitch Ratings’ning O‘zbekiston banklari bo‘yicha direktori Pavel Kaptel bu o‘zgarishlarning sabablarini tushuntirdi.
Agentlikning operatsion muhitni baholash metodologiyasi iqtisodiy o‘sish dinamikasi, davlat tomonidan iqtisodiyot va bank sektorini tartibga solish darajasi hamda bank faoliyatiga ta’sir qiluvchi maxsus xavflarni o‘z ichiga oladi. Baholashda ikki asosiy ko‘rsatkich – aholi jon boshiga YAIM (jahon narxlari bo‘yicha dollar ekvivalentida) va BMI kompaniyasi tomonidan hisoblangan Operatsion xavf indeksi (ORI) qo‘llaniladi.
O‘zbekiston banklari uchun operatsion muhit "B" darajasida baholangan, bu Markaziy Osiyo va Kavkaz mintaqasidagi boshqa ko‘plab davlatlardan pastroqdir. Misol uchun, Qozog‘iston "BB+", Gruziya, Armaniston va Ozarbayjon "BB-" darajasida baholangan.
Biroq, O‘zbekiston iqtisodiy muhitida sezilarli ijobiy o‘zgarishlar kuzatilmoqda. 2023-yilda "Ipoteka bank"ning davlat ulushi xususiylashtirilishi muvaffaqiyatli amalga oshirildi va boshqa davlat banklarini xususiylashtirish bo‘yicha ham tayyorgarlik ishlari olib borilmoqda.
O‘zbekiston Markaziy banki bank sektorini rivojlantirish uchun bir qator chora-tadbirlarni amalga oshirdi, jumladan, minimal kapital talablarini oshirdi va kreditlar sifatini yaxshilash bo‘yicha qat’iy choralar ko‘rdi. Ushbu islohotlar natijasida bank sektorida ijobiy o‘zgarishlar kuzatilmoqda.
Fitch’ning prognoziga ko‘ra, yaqin 1-2-yil ichida operatsion muhit bahosi "B+" darajasiga ko‘tarilishi mumkin. Ushbu o‘zgarishlar xususiy banklar, xususan, "Kapitalbank" va "Ipak Yo‘li" banklarining reytinglarida ham aks etdi.
Davlat banklarining reytinglari esa davlat tomonidan ko‘rsatiladigan qo‘llab-quvvatlashga asoslangan va operatsion muhit bahosidagi o‘zgarishlardan unchalik ta’sirlanmaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
