Dam olish kunlari O‘zbekistonning barcha hududlarida, asosan, quruq va iliqroq ob-havo kuzatilishi kutilmoqda. Harorat bosqichma-bosqich ko‘tarilib, kunduzi bahorsimon iliqlik seziladi.
Sinoptiklar ma’lumotiga ko‘ra, juma kuni respublika bo‘ylab kunduzi havo +8…+11 daraja atrofida bo‘ladi. Shanba va yakshanba kunlari esa isish yanada kuchayib, kunduzi +12…+15 darajagacha chiqishi prognoz qilinmoqda. Kechasi va ertalab ham sovuq “ortga chekinish”ni boshlaydi: yakshanbaga borib minimal harorat 0…+3 darajagacha ko‘tarilishi aytilmoqda.
Ayrim hududlarda tuman tushishi davom etishi mumkin. Shamol esa sharq tomondan yengildan o‘rtacha tezlikkacha esadi.
Toshkentda qanday?
Poytaxtda yog‘ingarchilik kutilmaydi. Juma kuni kunduzi +9…+11 daraja atrofida bo‘ladi. Shanba-yakshanba kunlari harorat asta-sekin ko‘tarilib, kechalari +1…+3, kunduzi esa +13…+15 darajagacha yetishi mumkin.
Xulosa: dam olish kunlari reja qilishga juda qulay — faqat tumanli paytlarda yo‘lda ehtiyot bo‘ling, qolgani “yanvarga nisbatan kayf”.
“Zamin”ni Telegramʻda oʻqing!
