Antuan Semenoni 72 million yevro evaziga safiga qo‘shib olgan «Manchester Siti» Xosep Gvardiola davridagi transfer xarajatlarini yana bir pog‘onaga ko‘tardi: «shaharliklar» Pep qo‘l ostidagi umumiy sarfini 2 milliard yevro chegarasidan oshirdi.
Gvardiola 2016 yil yozida «Siti»ni qabul qilib olganidan buyon klub transfer bozorida doim faol bo‘lib kelyapti. Va statistika shuni ko‘rsatadiki, bu ko‘lamda mablag‘ tikish bo‘yicha hozircha unga teng keladigan murabbiy yo‘q: o‘sha davr oralig‘ida hech bir mutaxassis bir klub bilan bunday miqdorda xarajat qilmagan.
Qizig‘i, Pepdan keyingi o‘rinda Diyego Simeone turibdi — u davrda «Atletiko» taxminan 1,22 milliard yevro sarflagan. Uchinchi natija esa Antonio Kontega tegishli: 1,19 milliard yevro. Ya’ni, bu “milliardlik liga”da ham raqobat qattiq, lekin Gvardiola baribir bir qadam oldinda.
Shu davr mobaynida bir klubda 1 milliard yevrodan ortiq mablag‘ sarflay olgan murabbiylar ham ko‘p emas — faqat uch nafar:
- Pep Gvardiola («Manchester Siti»),
- Diyego Simeone («Atletiko»),
- Mikel Arteta («Arsenal»).
Gvardiola faoliyatini umumiy hisoblasak, manzara yanada “portlaydi”: u boshqargan klublar transferlar uchun jami 2,58 milliard yevro sarflagan. Bu ko‘rsatkich bilan Pep barcha murabbiylar orasida mutlaq yetakchi hisoblanadi.
Undan keyingi ro‘yxat ham nomdor:
- Joze Mourinyu — 1,99 milliard yevro,
- Karlo Anchelotti — 1,8 milliard yevro,
- Massimiliano Allegri — 1,6 milliard yevro,
- Diyego Simeone — 1,55 milliard yevro.
Xulosa oddiy: katta futbolda katta pul — katta mas’uliyat. «Siti» sarfni oshiryapti, demak, talab ham oshadi. Endi muxlislar uchun asosiy savol bitta: bu milliardlar maydonda yana qanday sovrinlarga aylanadi?
“Zamin”ni Telegramʻda oʻqing!
