O‘zbekiston Prezidenti Shavkat Mirziyoyev Markaziy Osiyo va Yaponiya davlatlari o‘rtasidagi hamkorlikni rivojlantirish bo‘yicha bir qator tashabbuslar bilan chiqdi. Prezidentning takliflari markazida 2040 yilgacha strategiya ishlab chiqish va mintaqa yetakchilarining muntazam uchrashuvlarini tashkil etish masalalari turibdi.
20 dekabr kuni Tokioda o‘tkazilgan «Markaziy Osiyo + Yaponiya» muloqotining birinchi sammitida Shavkat Mirziyoyev davlat rahbarlari darajasidagi bunday uchrashuvlarni har ikki yilda bir marta o‘tkazishni taklif qildi. Keyingi uchrashuvlardan birini O‘zbekiston o‘z hududida o‘tkazishga tayyorligini bildirdi.
Prezident, shuningdek, «Markaziy Osiyo – Yaponiya 2040» strategiyasini ishlab chiqishni taklif qildi. Bu hujjat uzoq muddatli hamkorlik yo‘nalishlarini belgilab berishi va iqtisodiy hamda barqaror rivojlanish sohasidagi aniq loyihalarni o‘z ichiga olishi lozim.
Iqtisodiyotga oid tashabbuslar doirasida Mirziyoyev mintaqa infratuzilmasi va sanoatini rivojlantirish uchun investitsiya jamg‘armasi tashkil etishni taklif qildi. Shuningdek, sanoat kooperatsiyasi va texnologiyalarni uzatish uchun yapon texnoparklari tarmog‘ini shakllantirishni taklif etdi.
Prezident raqamli kun tartibiga alohida urg‘u berdi. U sun’iy intellekt, narsalar interneti va kiberxavfsizlik sohalaridagi loyihalarni birlashtiruvchi «Markaziy Osiyo – Yaponiya» raqamli markazini tashkil etishni taklif qildi.
Bundan tashqari, Mirziyoyev «yashil» energetika, ekologiya va transport sohalarida hamkorlikni rivojlantirishni, shuningdek, seysmik xavfsizlik yo‘nalishida hamkorlikni kuchaytirishni taklif etdi. Gumanitar sohada esa ta’lim sohasidagi hamkorlikni kengaytirish va yoshlar dasturlarini ishga tushirish zarurligini ta’kidladi.
Sammit yakunida ishtirokchilar Tokio deklaratsiyasini qabul qildilar.
Mehmon guruhidagi foydalanuvchilar ushbu nashrga izoh qoldira olmaydi.
