O‘zbekistonda 2026 yil 1 apreldan boshlab bir qator to‘lovlar faqat naqdsiz shaklda qabul qilinadi. Gap shunchaki “qulaylik” haqida emas — qarorning asosiy maqsadi naqdsiz hisob-kitoblarni ommalashtirish va yashirin iqtisodiyot ulushini qisqartirish.
Eng ko‘p muhokama bo‘ladigan jihat — yonilg‘i quyish shoxobchalari. 1-apreldan transportlarga yonilg‘i quyish shoxobchalarida neft-gaz mahsulotlarini sotish hamda elektromobillarni zaryadlash xizmatlari bank kartalari yoki elektron to‘lov tizimlari orqali amalga oshirilishi belgilangan. Ya’ni “naqd berib ketaveraman” degan ssenariy ishlamay qoladi.
Bu tartib faqat “zapravka” bilan cheklanmaydi. Shu sanadan elektr energiyasi, tabiiy gaz, ichimlik suvi uchun to‘lovlar, shuningdek alkogol va tamaki mahsulotlari uchun to‘lovlar ham naqdsiz yo‘lga o‘tadi. Qolaversa, qiymati 25 million so‘mdan yuqori bo‘lgan tovar va xizmatlar bo‘yicha to‘lovlar ham faqat karta/elektron to‘lov bilan bo‘ladi.
Yana bir katta nuqta — yirik oldi-sotdilar. Hujjatda ko‘chmas mulk obyektlari hamda ishlab chiqarilganiga 10 yildan oshmagan ayrim toifadagi transport vositalari (M, N, O va G toifalari) va maxsus avtotransportni sotish-sotib olishda ham to‘lovlar naqdsiz shaklda amalga oshirilishi ko‘rsatilgan.
Amaliyotda nimani anglatadi?
- Karta/telefondagi to‘lov ilovasini “doim tayyor” holatga keltirish kerak bo‘ladi.
- "Zapravka"ga kirishdan oldin balans va limitlarni tekshirib qo‘yish foydadan xoli emas (aks holda kassa oldida “oy-yoy” boshlanadi).
- Katta xaridlar va oldi-sotdilarda pul o‘tkazish, chek va tasdiq hujjatlari tartibliroq bo‘ladi — keyin “men bergandim-ku” degan bahslar kamayadi.
Xulosa oddiy: 1-apreldan “naqdga o‘rganganlar” uchun rejim o‘zgaradi. Ertaroq moslashsangiz, keyin navbatda asab yo‘qotmaysiz.
“Zamin”ni Telegramʻda oʻqing!
