Ro‘ziqul Berdiyev "Nasaf"ning bugungi o‘yini haqida nimalar dedi?

O‘zbekiston Superligasining 8-turi doirasida “Nasaf” safarda “Xorazm” jamoasi mehmoni bo‘lib, muhim ochkolarni yo‘qotdi. Uchrashuvdan so‘ng “Nasaf” bosh murabbiyi Ro‘ziqul Berdiyev matbuot anjumanida ishtirok etib, o‘yin yuzasidan fikr bildirdi.

“Ochko yo‘qotishga arziydigan o‘yin bo‘ldi”

Murabbiy natijadan qattiq norozi bo‘lgani ko‘rinib turdi. Uning so‘zlariga ko‘ra, “Nasaf” kutilgan o‘yinni namoyish qila olmadi:

“Bugun ochko yo‘qotishimiz bejiz emas. Biz o‘ylashgan o‘yin ssenariysi amalga oshmadi. Raqib bizdan ko‘ra faolroq harakat qildi, ko‘proq hujum vaziyatlari yaratdi va umumiy manzarada ustun ko‘rindi. Balki bu ruhiy tayyorgarlik bilan bog‘liqdir. Yigitlar bu bahsga ruhan to‘liq shay emasdek tuyuldi. Shunday natijaga sabab bo‘lgan omillar ko‘p, ammo aytib o‘taman — bugun ochko yo‘qotishimiz tabiiy edi.”

“Xorazm” haqida Berdiyev qanday fikrda?”

Murabbiyga “Xorazm”ning o‘yinlari va jamoa haqida alohida savol berildi. U jamoaning shakllanishi va maydondagi harakatini yuqori baholadi:

“Hozirgi 'Xorazm' — tajribali futbolchilardan tashkil topgan jamoa. Ularning barchasi avval ham yuqori saviyada to‘p surishgan. Bugun ular buni yana bir bor isbotladi. Menimcha, jamoa a’zolari bir-birini to‘liq tushunib olishsa, u holda ularning o‘yin sifati yanada oshadi. Tajribali futbolchilar o‘z so‘zini hali aytadi. Futbolning Xorazmga qaytgani menga juda yoqdi. Agar jamoa uchrashuvlarini o‘z uyida, muxlislar oldida o‘tkaza boshlasa, bu nafaqat yoqimli, balki futbol muhiti uchun yanada ijobiy ta’sir ko‘rsatadi.”

“Nasaf” bu gal o‘z o‘yinini topa olmadi. “Xorazm” esa o‘ziga ishongan holda maydonga tushdi va e’tiborni o‘ziga qaratdi. Ushbu duel “Nasaf” uchun ogohlik, “Xorazm” uchun esa ishonch bo‘ldi.

Sizchi, “Nasaf” qayta kuch to‘playdimi yoki “Xorazm” yangi mavsumning syurprizi bo‘ladimi? “Zamin”ni Telegramʻda oʻqing!