Italiya A Seriyasining 25-turida “Milan” safarda “Piza”ga qarshi murakkab kechgan bahsda g‘alabani qo‘lga kiritdi. Bu haqda euro-football.ru xabar beradi.
Uchrashuv avvalida mezbonlar ham xavfli vaziyat yaratdi: Filip Stoilkovich jarima maydoni chap chetidan ofsayddan zarba yo‘lladi, biroq “Milan” darvozaboni jamoasini qutqarib qoldi. 39-daqiqada esa Zakari Atekame o‘ng qanotdan aniq uzatma berdi va Ruben Loftus-Chik bosh bilan hisobni ochdi — 0:1.
Ikkinchi taym boshida “Milan” yana gol urdi, biroq u bekor qilindi: Niklas Fyulkrugning uzatmasidan so‘ng Adryen Rabo to‘pni darvozaga joyladi, ammo epizodda Fyulkrug qo‘l bilan o‘ynagani qayd etildi. Ko‘p o‘tmay Fyulkrug 11 metrlikdan ham foydalana olmadi — zarbasi sust chiqib, to‘p ustunga tegib maydonni tark etdi.
71-daqiqada “Piza” hisobni tenglashtirdi: Stoilkovich chap qanotdan past uzatma tashladi, kurashda to‘p Straxinya Pavlovichdan qaytib Felipe Loyolaning oyog‘i ostiga keldi. U biroz siljib, to‘pni o‘ng burchakka aniq yo‘lladi — 1:1.
O‘yin so‘ngida “Milan” g‘alaba golini urdi. 85-daqiqada Luka Modrich hujumni boshlab berdi: Samuele Richchiga uzatma tashlandi, Richchi yiqilayotgan holatda to‘pni qayta Modrichga oshirdi. Luka jarima maydoni ichida markazga siljib, oyoq tashqi tomonida o‘ng burchakka yo‘lladi — 1:2.
90-daqiqada Rabo hakam bilan tortishib qoldi va birinchi ogohlantirishidan keyin tezda ikkinchi sariq kartochkani ham olib, maydonni tark etdi.
Ushbu g‘alabadan so‘ng “Milan” peshqadamdan 5 ochko ortda bormoqda. “Piza” esa turnir jadvalida so‘nggi o‘rinni bo‘lishib turibdi.
“Zamin”ni Telegramʻda oʻqing!
