Marselo Gallardo murabbiy sifatidagi so'nggi uchrashuvini o'tkazdi: uning jamoasi «Banfield»ga qarshi bahsda «River Pleyt»ni 3:1 hisobida g'alabaga olib chiqib, ketma-ket uch mag'lubiyatdan iborat omadsiz seriyaga nuqta qo'ydi. Bu haqda euro-football.ru xabar beradi.
Aynan shu muvaffaqiyatsiz davr Gallardoning lavozimi bilan xayrlashishiga sabab bo'ldi, biroq klub unga munosib tarzda ketish imkonini berdi. Murabbiy esa o'yindan keyingi lahzalarda buni juda ta'sirli tarzda namoyon qildi.
«Hammaga shunchaki rahmat. Sizlarning mehringizni so'z bilan ifodalash qiyin. Men abadiy ketmayapman. «River»dan hech kim abadiy ketmaydi. Bu sehrli maskan: hatto ketsang ham, baribir klub bilan qolasan», — dedi Gallardo ko'z yoshlarini yashirmay.
Eslatib o'tamiz, Gallardo 90-yillarda «River Pleyt» safida ham, Argentina milliy jamoasida ham to'p surgan.
“Zamin”ni Telegramʻda oʻqing!
