Birgina xato – tirik odam 9 kun “o‘lik”ka aylandi

Qozog‘istonning Qostanay viloyatida kutilmagan va g‘ayrioddiy holat yuz berdi. Vladimir Shremf ismli fuqaro tizimdagi texnik xatolik sabab bir muddat rasmiy ravishda vafot etgan shaxs sifatida qayd etilgan. Bu holat unga jiddiy qiyinchiliklar keltirib chiqargan.

“31.kz” ma’lumotiga ko‘ra, voqea Shremf onasining vafotiga oid hujjatlarni rasmiylashtirish jarayonida yuzaga kelgan. Tibbiyot xodimining noto‘g‘ri kiritgan ma’lumoti oqibatida erkakning shaxsiy ma’lumotlari tizimda “marhum” sifatida qayd etilgan.

Natijada u bir necha kun davomida rasmiy hujjatlarda mavjud bo‘lmagan shaxsga aylangan. Bu esa uning kundalik hayotiga keskin ta’sir ko‘rsatgan. U ishga kira olmagan, haydovchilik guvohnomasi bekor qilingan, avtomobil boshqarish imkoniyatidan mahrum bo‘lgan.

Shuningdek, bank hisoblari bloklanganligi sababli moliyaviy operatsiyalarni amalga oshirish ham imkonsiz bo‘lib qolgan. Davlat idoralariga murojaat qilganda esa barcha joyda yagona shaxs identifikatsiya raqami talab qilingan, biroq tizimda u “yo‘q shaxs” sifatida ko‘rsatilgan.

“Men hech narsani hal qila olmadim. Hamma joyda men tirik ekanimni isbotlashga majbur bo‘ldim,” — deya u vaziyatni izohlagan.

Oradan 9 kun o‘tgach, xatolik tuzatilib, Vladimir Shremf rasmiy ravishda “tirik” sifatida qayta ro‘yxatga olingan. Shu tariqa uning huquqiy maqomi tiklangan.

Endilikda u ushbu xato sabab yetkazilgan moddiy va ma’naviy zarar bo‘yicha sudga murojaat qilishni rejalashtirmoqda.

Tibbiyot muassasasi vakillari esa holat yuzasidan izoh berib, xatolik aniqlanishi bilanoq uni bartaraf etish choralari ko‘rilganini ma’lum qilgan. Shuningdek, mas’ul xodim intizomiy javobgarlikka tortilgani qayd etilgan.