Angliyaning mashhur klublaridan biri "Arsenal" yozgi transferlar oldidan tarkibni kuchaytirish masalasida faol ish olib bormoqda. Londonliklar hujum chizig‘ini yanada samarali qilish maqsadida "Galatasaroy" forvardi Viktor Osimhenga jiddiy qiziqish bildirmoqda.
Maʼlumotlarga koʻra, klub sport direktori Andrea Berta Turkiyaga maxsus tashrif buyurib, Superliganing 31-turidan oʻrin olgan markaziy uchrashuv — "Galatasaroy" hamda "Fenerbahche" oʻrtasidagi derbini stadiondan kuzatdi. Ushbu bahsda u aynan Osimhenning harakatlari, pozitsion oʻyini va hujumdagi faolligini diqqat bilan tahlil qilgani aytilmoqda.
Manbalarga koʻra, “Arsenal” rahbariyati nigeriyalik hujumchini yozgi transfer oynasida asosiy nomzodlardan biri sifatida koʻrib chiqmoqda. Shu bilan birga, Berta ushbu safar davomida “Galatasaroy” rahbarlari bilan dastlabki muzokaralarni ham boshlab yuborgani haqida xabarlar bor.
Eʼtiborlisi, mazkur uchrashuvda “Galatasaroy” raqibini 3:0 hisobida ishonchli tarzda magʻlub etdi. Osimhen esa jamoasining gollaridan biriga mualliflik qilib, yana bir bor oʻzining yuqori darajasini namoyon etdi.
Joriy mavsumda hujumchi barqaror oʻyini bilan ajralib turibdi. U 31 ta oʻyinda maydonga tushib, 20 ta gol va 7 ta assist qayd etishga muvaffaq boʻlgan. Bu koʻrsatkichlar uni Yevropa klublari uchun juda jozibador variantga aylantirmoqda.
Ayni paytda futbolchining "Galatasaroy" bilan shartnomasi 2029 yilgacha amal qiladi. Transfermarkt maʼlumotiga koʻra, uning bozor qiymati 75 million yevro atrofida baholanmoqda.
Qisqasi, Osimhen atrofidagi transfer intrigasi qizib bormoqda. Agar muzokaralar muvaffaqiyatli kechsa, u yaqin orada Angliya Premer-ligasida yangi sahifa ochishi mumkin.
