Ўзбекистоннинг йирик саноат конгломерати Akfa Group АҚШ ҳудудида йирик инвестицион лойиҳани амалга оширишни бошлади. Бу ҳақда компания асосчиси Жахонгир Ортиқхўжаев Ўзбекистон 24 телеканалига берган интервьюсида маълум қилди.
Лойиҳага кўра, Туркия компанияси билан ҳамкорликда Кентукки штатида янги ишлаб чиқариш заводи қурилиши бошланди. Лойиҳа учун умумий инвестиция миқдори 600 миллион долларга баҳоланмоқда.
Мазкур лойиҳа ўзбек бизнесининг АҚШ бозорига жиддий чиқишини англатади ва у босқичма-босқич амалга оширилади. Дастлабки босқичда завод қурилишига 105 миллион доллар йўналтирилади.
Кентукки штатида жойлашадиган ишлаб чиқариш мажмуаси кенг турдаги маҳсулотлар ишлаб чиқаришга ихтисослашади. Ортиқхўжаевнинг таъкидлашича, алюминий маҳсулотлари, автомобил саноати учун эҳтиёт қисмлар, қуёш панеллари компонентлари ва ойна тизимларини ишлаб чиқариш йўлга қўйилади.
Бу қарор компаниянинг Шимолий Америка бозорини ўзлаштириш стратегиясининг мантиқий давомидир. Бу йўналишда дастлабки қадам 2024-йилнинг феврал ойида қўйилган эди.
Ўшанда Akfa Group таркибидаги Benkam компанияси АҚШга алюминий профилларининг илк экспортин амалга оширган эди. Ушбу тажриба компания раҳбариятига мазкур йўналишнинг истиқболли эканини тасдиқлади ва экспортнинг устувор йўналиши сифатида қайд этилди.
Ўзбекистон бизнесининг АҚШдаги инвестицион фаолияти икки томонлама иқтисодий алоқаларнинг мустаҳкамланиши фонида кенгаймоқда. Аввалроқ АҚШ президенти Дональд Трамп Ўзбекистоннинг Америка иқтисодиётига катта маблағ киритишга тайёрлиги ҳақида баёнот берган эди.
Akfa Group лойиҳаси ушбу ниятларнинг амалий тасдиғи сифатида қаралмоқда. Akfa Group халқаро фаолиятини фақат саноат сектори билан чеклаб қўймаётгани ҳам эътиборга молик.
Жорий йилнинг сентябр ойида Нью-Йоркда Ўзбекистон президенти ва АҚШ компаниялари раҳбарлари иштирокидаги давра суҳбатида Akfa Group билан бутунжаҳон миқёсида машҳур Cleveland Clinic ўртасида шартнома имзоланди. Ушбу ҳамкорлик Ўзбекистонда кўп тармоқли тиббиёт маркази ва таълим муассасаси ташкил этилишини кўзда тутади.
Бу эса компаниянинг турли соҳаларда илғор халқаро стандартларни жорий этиш бўйича узоқ муддатли режалари борлигини намоён этади. Шу тариқа, Кентуккидаги завод қурилиши ўзбек капиталининг жаҳон иқтисодиётига интеграциялашувга қаратилган кенг кўламли стратегиясининг бир қисми ҳисобланади.
