Илон Маск инсоният тарихидаги энг ғайриоддий ғоялардан бирини илгари сурди. Унга кўра, инсонлар келажакда Қуёшдан Ерга етиб келаётган нурланиш миқдорини сунъий йўлдошлар ёрдамида назорат қилиши мумкин. Бу ҳақда у Х (собиқ Twitter) платформасида ёзиб, “фақат жуда озгина ўзгаришлар билан иқлимни барқарорлаштириш мумкин” деган фикрни билдирди.
Маскнинг концепцияси Қуёш нурланишини бошқариш — Solar Radiation Management (SRM) — ғоясига асосланган. Яъни, Ер ва Қуёш орасида “ақлли ойналар” ёки махсус экранлар ўрнатилиб, улар нурланишни тўсиш ёки акс эттириш орқали иқлим мувозанатини сақлайди.
Ҳозирча бу фақат назарий фикр бўлса-да, у глобал миқёсда катта баҳс-мунозарага сабаб бўлди. Иқлимшунослар бундай тизимни техник жиҳатдан ўта мураккаб ва хавфли деб ҳисобламоқда. Уларнинг фикрича, Қуёш нурланишини сунъий равишда ўзгартириш Ердаги табиий мувозанатни бузиб, ўсимликлар, ҳайвонлар ва бутун экотизим учун салбий оқибатларга олиб келиши мумкин.
Илон Маск ҳозирда 9 мингдан ортиқ Starlink йўлдошларини бошқаради, аммо улар интернет таъминоти учун мўлжалланган. Қуёшни тўсиш лойиҳаси учун эса мутлақо янги турдаги — ўзгарувчан оптик қопламали, “ақлли” ойнага эга йўлдошлар керак бўлади.
