Амурда автобус апаты: өзбекстандықтар болғаны теріске шығарылды

Ресейдің Амур облысында болған жол апаты қоғам назарын аударды. Бұған дейін БАҚ-та Өзбекстан, Түркия және Тәжікстан азаматтарын тасып келе жатқан автобустың аударылғаны туралы хабар тараған еді. Алайда ресми деректер бұл ақпаратты жоққа шығарды, деп хабарлады Көші-қон агенттігі.

Мәліметтерге қарағанда, 16 қазан күні Благовещенск–Свободный тас жолының 19-шақырымында жолаушылар автобусы мен жеңіл автокөлік қатысқан жол-көлік оқиғасы болған. Апатқа ұшыраған автобус Түркияның ірі құрылыс компаниясы “Yamata”-ға тиесілі болған.

Өзбекстанның Хабаровск қаласындағы Бас консулдығы мен Көші-қон агенттігінің Ресей Федерациясындағы өкілдігі оқиға бойынша жедел тергеу жүргізген.

Тексеру нәтижесінде автобуста Өзбекстан Республикасы азаматтары болмағаны анықталды. Ресми мәліметтерге сәйкес, апат салдарынан бір жолаушы қаза тауып, тағы 14 адам әртүрлі деңгейдегі жарақаттар алған.

Көші-қон агенттігі Өзбекстан азаматтарының Ресей аумағындағы қауіпсіздігін қамтамасыз ету мақсатында тиісті органдармен тығыз ынтымақтастықта жұмыс істеп жатқанын атап өтті.

Түрік компаниясына тиесілі автобустың қатысуымен болған апаттың себептері қазір жергілікті құқық қорғау органдары тарапынан зерттеліп жатыр.