Венгрия үкіметі Ресей президенті Владимир Путиннің Будапештке ықтимал сапары кезінде Халықаралық қылмыстық соттың (ХҚС) ордері негізінде қамауға алынбайтынын хабарлады. Бұл туралы елдің сыртқы істер және сыртқы экономикалық байланыстар министрі Петер Сийярто мәлімдеді.
Сийяртоның айтуынша, Венгрия Путинді қабылдауға және келіссөздер өткізу үшін тыныш, қауіпсіз жағдай жасауға дайын. “Біз мұнда Владимир Путинді қабылдаймыз және оның сәтті келіссөздер өткізіп, еліне аман оралуына алаңдаймыз”, — деді ол журналистерге.
Министрдің сөзіне қарағанда, Венгрия Ресей мен АҚШ президенттері үшін Будапешттегі кездесуге барлық жағдайды қамтамасыз етуге дайын. “Біз ешкіммен кеңесуге міндетті емеспіз. Венгрия — егемен ел”, — деп атап өтті ол.
АҚШ президенті Дональд Трамп 16 қазанда Ресей президентімен Венгрия астанасында кездесуді жоспарлап отырғанын айтқан, бірақ нақты күні белгіленбеген.
Венгрия 1999 жылы ХҚС-тың негізін қалаған Рим статутына қосылып, екі жылдан кейін оны ратификациялаған. Алайда 2023 жылы ресми билік Путин елге келсе, оны қамауға алмайтынын мәлімдеген.
2025 жылы Венгрия үкіметі сондай-ақ ХҚС ордері бар Израиль премьер-министрі Биньямин Нетаньяхуды да шақырған. Осы сапар аясында Венгрия соттан шығу ниетін білдірген, бірақ бұл процесс әлі аяқталған жоқ.
Путиннің соңғы халықаралық сапарлары да ХҚС ордеріне қарамастан еркін өтті. Ол 2024 жылдың қыркүйегінде Моңғолияға, 2025 жылдың қазанында Тәжікстанға барған — екі ел де Рим статутын ратификациялаған, бірақ ешқандай қамау әрекеті болмаған.
Сарапшылардың пікірінше, Венгрияның бұл ұстанымы Батыс пен Ресей арасындағы тепе-теңдікті сақтауға бағытталған саяси қадам болып табылады. Ел ЕО мүшесі болғанымен, Мәскеумен байланысын үзгісі келмейді.
“Zamin”-ді Telegram-нан оқыңыз!
