Украина Қарулы Күштері Ростов облысында орналасқан Новошахтинск мұнай өңдеу зауытына әуеден ұшырылатын Storm Shadow қанатты зымырандарымен соққы жасағанын хабарлады. Бұл туралы 2025 жылғы 25 желтоқсан, бейсенбіде Украина Қарулы Күштері Бас штабы өзінің ресми Telegram-арнасында ақпарат таратты.
Киев мәлімдемесінде соққының дәл нысанаға тигені айтылған. “Әуеден ұшырылатын Storm Shadow қанатты зымырандарымен Новошахтинск МӨЗ-ге сәтті шабуыл жасалды. Көптеген жарылыстар тіркеліп, нысан жойылған”, — делінген ресми ақпаратта. Бас штаб мәліметіне сәйкес, бұл зауыт Ресей армиясының қажеттілігі үшін дизель отыны мен авиация керосинін жеткізуде маңызды инфрақұрылым нысаны болып табылады.
Ростов облысының губернаторы Юрий Слюсар да Новошахтинск қаласы аумағында соққылар болғанын растады. Оның айтуынша, шабуылдан кейін жарылыстар орын алып, өрт шығып, өрт сөндірушілердің бірі жарақат алған.
Қазіргі уақытта зауытқа келтірілген залал көлемі нақты бағаланбаған. Украинаның Эксиленова+ Telegram-арнасы болса, МӨЗ үстінде қара түтін бағаналары көтерілген бейнекадрларды жариялады. Кадрлар аумақта күрделі өрт болғанын көрсетеді.
Мәліметтерге қарағанда, кең ауқымды әскери қимылдар басталғаннан бері Украина Новошахтинск МӨЗ-ге кемінде алты рет соққы жасаған. Алғашқы шабуыл 2024 жылғы наурыз айында тіркелген. Алайда қазіргі шабуыл ерекше маңызға ие — себебі бұл зауытқа қарсы Storm Shadow зымырандары қолданылған алғашқы жағдай саналады.
Новошахтинск мұнай өңдеу зауыты Украина бақылауындағы аумақтан шамамен 175 шақырым қашықтықта орналасқан. Сонымен бірге, Storm Shadow қанатты зымырандарының ұшу қашықтығы 250 шақырымнан асатыны белгілі. Бұл Киевке терең тылдағы инфрақұрылым нысандарын нысанаға алу мүмкіндігін беретінін көрсетеді.
Қысқаша айтқанда, Новошахтинск МӨЗ-ге жасалған бұл соққы тек тактикалық қана емес, логистика тұрғысынан да маңызды болып отыр. Энергетика мен отын жеткізуге бағытталған мұндай шабуылдар тылдағы қысымды одан әрі күшейтіп жатыр.
