8 сәуірде Түркияның Османия провинциясында жауған нөсер жаңбырдан кейін болған су тасқыны қайғылы зардаптарға әкеп соқты. Жергілікті БАҚ, соның ішінде "Sözcü" хабарлағандай, табиғи апат салдарынан көлікте болған екі азамат қаза тапты.
Хабарланғандай, Қадырлы ауданындағы Бүлбұл шатқалы қатты жауын-шашын салдарынан тасып, жақын маңдағы бірқатар махалланы су басқан. Күшті ағыс кейбір автокөліктерді ағызып кетсе, басқалары толығымен су астында қалды. Осындай көліктердің бірінде болған екі адам құтқарушылар келгенге дейін қайтыс болды.
Оқиға орнына облыс әкімі Махмуд Фатих Серденгечти келіп, зардап шеккен аймақтарды тексеріп, жағдайды тікелей бақылауға алды. Ол аудандық денсаулық сақтау бөлімі мен Мұғалімдер үйінің маңындағы автотұрақ аумағында екі азаматтың қаза тапқанын, ал көлікті тасқын алып кеткенін атап өтті.
Сондай-ақ сел мен су тасқынының салдарын жою үшін барлық тиісті қызметтер жұмылдырылды. Құтқару жұмыстарына 550 қызметкер мен 150-ден астам арнайы техника жұмылдырылып, ең алдымен азаматтардың қауіпсіздігін қамтамасыз ету, содан кейін материалдық шығынды азайту шараларына ерекше назар аударылды.
Ресми өкілдер аймақтағы жағдай тұрақталғанша бақылау күшейтілетінін, ал тұрғындарға сақтық шараларын қатаң сақтау ұсынылғанын хабарлады.
