13 сәуірде Дональд Трамп Иран порттарын блокадаға алу туралы бұйрық бергеннен кейін әлемдік нарықта мұнай бағасы күрт өсті. Бұл туралы BBC хабарлады.
Деректерге сүйенсек, жаһандық эталондық Brent мұнайының бағасы 7 пайыздан астам өсіп, барреліне 100 доллардан асты. Кейбір сауда-саттықта баға 7,5 пайызға өсіп, 103 долларға жақындағаны байқалды.
АҚШ-тың Орталық қолбасшылығы 12 сәуір күні кешке Иран порттарына әскери блокада енгізілетінін мәлімдеді. Бұл шектеулер Иран порттарына кіретін және шығатын барлық теңіз көліктеріне қатысты, сондай-ақ Парсы және Оман шығанағындағы қозғалысқа да әсер етеді.
Сонымен қатар, Трамп Truth Social желісіндегі мәлімдемесінде Ормуз бұғазы арқылы өтетін кемелерге қатысты қатаң шаралар қабылданатынын атап өтті. Оның айтуынша, АҚШ Әскери-теңіз күштері аймақтағы бақылауды күшейтіп, кез келген қауіп-қатерге қатаң жауап береді.
Сарапшылардың пікірінше, бұл шиеленіскен жағдай жаһандық энергетикалық нарықтағы тұрақсыздықты күшейтіп, бағаның тағы да өсуіне әкелуі мүмкін.
“Zamin”-ді Telegram-нан оқыңыз!
