АҚШ-та жыныстық қылмыс жасады деп айыпталған қаржыгер Джеффри Эпштейнге қатысты тағы бір құпия жайт белгілі болды. Оның бұрынғы камераласы Николас Тарталоне Эпштейн қайтыс болғанға дейін жазған деп болжанып отырған хаттың мазмұны туралы мәлімет берді.
Бұл туралы The New York Times хабарлады.
Мәлім етілгендей, Тарталоне бұл жазбаны 2019 жылғы шілдеде, Эпштейн әлі тірі кезінде тапқан. Сол уақытта Эпштейн түрмеде мойнында күдікті іздері бар, ес-түссіз күйде табылған болатын.
Содан кейін ол басқа бөлімге ауыстырылып, өз-өзіне қол жұмсау қаупіне байланысты арнайы бақылауға алынды.
Тарталоне кейін берген жауабында жазбаны қалай тапқанын егжей-тегжейлі түсіндірген. Оның айтуынша, Эпштейн басқа камераға ауыстырылғаннан кейін, ол өз камерасында қалған кітаптардың бірін ашып көріп, ішінен жасырылған сары түсті қағаз қиындысын тапқан.
Аталған жазбада тергеушілер Эпштейннің қызметін бірнеше ай бойы тексергенімен, «ешқандай дәлел табылмағаны» туралы жазылған. Сондай-ақ, онда «Олар менен не күтіп тұр — жылауымды ма?
Уақыт келді, қоштасамын» деген мазмұндағы сөздер де болған.
Қызығы сол, бастапқыда Эпштейн түрме қызметкерлеріне мойнындағы жарақаттар үшін дәл Тарталонені айыптап, өз-өзіне қол жұмсау ниеті жоғын білдірген. Алайда көп ұзамай ол бұл пікірінен қайтып, камераласымен ешқандай мәселесі жоғын және өзін қауіпсіз сезінгенін айтқан.
Тарталоне бұл жазбаны өз адвокаттарына тапсырғанын мәлімдеген. Оның айтуынша, егер Эпштейн оны айыптауды жалғастыра берсе, бұл құжат сотта қорғану құралы ретінде қызмет етер еді.
Кейіннен құжаттың түпнұсқалығын анықтау үшін қолжазба сарапшылары да тартылған.
Мәліметтерге сәйкес, бұл хат кейіннен федералды сот тарапынан басқа қылмыстық іс аясында құпияландырылған. Тарталоненің адвокаттары жазбаны түпнұсқа деп бағалағанымен, бұл қорытынды қандай негізге сүйеніп жасалғаны жарияланбады.
Сарапшылардың пікірінше, бұл жаңа мәліметтер Джеффри Эпштейн ісі төңірегіндегі сұрақтарды одан әрі көбейтіп, оның өліміне қатысты дау-дамайды қайта жандандыруы мүмкін.
“Zamin”-ді Telegram-нан оқыңыз!
