Хантавирусқа байланысты жағдайлар көбеюде: АҚШ пен Францияда анықталды

Хантавирусқа қатысты жаңа жағдайлар АҚШ пен Францияда да тіркелді. Вирус тараған MV Hondius круиздік кемесінің айналасындағы жағдай халықаралық деңгейде қатаң бақылауға алынуда.

АҚШ-та аталған кемеде болған 17 американдықтың бірінен хантавирус сынамасы оң нәтиже берді. Тағы бір жолаушыда аурудың жеңіл белгілері байқалғаны хабарланды. АҚШ Денсаулық сақтау министрлігінің мәліметінше, екі азамат арнайы оқшаулау жағдайында ұшақпен тасымалданды.

Эвакуацияланған барлық жолаушылар арнайы жұқпалы аурулар орталығына орналастырылатыны айтылуда. Мамандар олардың денсаулығын тұрақты бақылауға алды.

Францияда да круиздік кемеде болған әйелден вирус анықталды. BFMTV таратқан ақпаратқа сәйкес, елдің денсаулық сақтау министрі Стефани Рист бұл жағдайды растады. Науқас жұқпалы аурулар ауруханасына жатқызылды, онымен байланыста болған 22 адам бақылауға алынды.

Бұған дейін Испанияда да MV Hondius кемесінен 94 адам эвакуацияланған болатын. Соңғы мәліметтерге сәйкес, қазіргі уақытқа дейін сегіз адамда хантавирус расталды. Үш адам қайтыс болды, тағы бір науқас Йоханнесбургтегі ауруханада ауыр халде жатыр.