«Үйде жалғыз» фильміне 35 жыл: тәтті қамырдан алып үй салынды

«Үйде жалғыз» фильмінің 35 жылдығына орай Disney+ Лос-Анджелес қаласында кино тарихындағы ең танымал үйлердің біріне ерекше құрмет көрсетті. Компания тәтті қамырдан — gingerbread — толықтай жасалған алып үй тұрғызып, әлемдік рекордты тіркеді.

Мәліметтерге сәйкес, ғимараттың биіктігі 8 метр, ал ұзындығы 18 метрді құрайды. Мұзбен қапталған тәтті үй тарихтағы ең үлкен gingerbread үй ретінде ресми түрде Гиннестің рекордтар кітабына енгізілді.

Disney+ басшылығы бұл жобаны мерекелік көңіл күй мен отбасылық дәстүрлердің символы деп бағалады. Үйді салу барысында тонна-тонна ұн, мыңдаған жұмыртқа, арнайы тәтті «кірпіштер», жеуге жарамды желім және қантты фондант пайдаланылған.

Сондай-ақ келушілерге фильмде аталған әйгілі «A Lovely Cheese Pizza» тағамын татып көру мүмкіндігі берілді. Қысқасы, балалық шақтың естеліктері тағы бір мәрте тәтті дәммен қайта жанданды.