Шакираның концерті екі миллион жанкүйердің басын қосты

Колумбиялық танымал әнші Шакира 2 мамыр күні Рио-де-Жанейродағы Копакабана жағажайында тегін концерт берді. Бұл өнер көрсету рекордтық деңгейде көрермен жинап, шамамен 2 миллион адамды бір алаңға топтастырды.

Концерт әншінің «Las Mujeres Ya No Lloran» атты әлемдік турнесі аясында өткені хабарланды. Шакира сахнада өзінің ең танымал хит әндерін орындап, бағдарламаны BZRP Music Sessions #53/66 туындысымен аяқтады.

Әртіс өнер көрсету барысында әйелдердің күші мен төзімділігі туралы әсерлі ойларымен бөлісті. Оның сөздерін жанкүйерлер қошеметпен қарсы алды.

Концертке келушілер таңертеңнен бастап жағажайға жинала бастады. Көрермендердің басым бөлігі тек Бразилиядан емес, басқа да Латын Америкасы елдерінен келгені атап өтілді.

Рио мэрі Эдуардо Паэс бұл шараның қалаға үлкен экономикалық пайда әкелетінін айтып, концерттің арқасында бюджетке шамамен 155 миллион доллар түседі деп күтілетінін мәлімдеді.

Сарапшылардың пікірінше, мұндай тегін көпшілік концерттер тек мәдени емес, экономикалық тұрғыдан да қаланың дамуына зор үлес қосады.