«Реал» Мендиден бас тартқысы келеді, бірақ мәселе бар

Мадридтің «Реал» клубы сол қаптал қорғаушысы Ферлан Мендимен қоштасуға дайын. 30 жастағы футболшы осы маусымда алаңға небәрі бір рет шықты — жарақатқа байланысты мәселелер маза бермей тұр. Журналист Марио Кортехананың мәліметінше, «Реал» басшылығы француз ойыншысын қуана-қуана жіберер еді, алайда оның кетуін қамтамасыз ету оңай болмайды: футболшы клубтан кеткісі келмейді, ал келісімшарты 2028 жылға дейін жарамды. Transfermarkt порталы Ферлан Мендидің болжамды құнын 8 млн еуро деп бағалайды. Ол 2019 жылдың жазында «Лионнан» ауысқалы бері «қаймақтүстілер» сапында жалпы 202 матч өткізіп, 6 гол соғып, 9 нәтижелі пас берген.