Арда Гүлер финалдан кейін эмоцияға беріліп, тайып құлап қалды

Испания Суперкубогының финалында «Барселонадан» 2:3 есебімен жеңілген «Реалдың» жартылай қорғаушысы Арда Гүлер матчтан кейін эмоциясын тежей алмады. Бұл туралы euro-football.ru хабарлайды .

20 жастағы футболшы 68-минутта Федерико Вальверденің орнына алаңға шықты. Бес минуттан кейін, 73-минутта «қаймақтылар» үшінші голды өткізіп алды, бұл гол «көк-алақызылдарға» жеңіс әкелді. Қорытынды ысқырықтан кейін «Барса» ойыншылары жеңісті тойлауға асыққан сәтте, Гүлер ашуға булығып, бүйір сызықтан бірнеше метр жерде жатқан су бөтелкесін теуіп жіберді, бірақ тепе-теңдігін жоғалтып, тайып құлап қалды. Бұл жағдай камераларға түсіп қалды.

«Реал» өткен маусымнан бері «Барселонаға» қарсы қатарынан үшінші финалда мүмкіндікті жіберіп алды.