«Манчестер Юнайтед» басшылығы команда капитаны Бруну Фернандешті осы жазғы трансферлік терезеде сатпау туралы шешім қабылдады. Клуб өкілдері португалиялық жартылай қорғаушыға оның кез келген жағдайда командада қалатынын және клубтың болашақ жетістіктерінің өзегі болатынын жеке хабарлады. Бұған дейін Сауд Арабиясының «Әл-Наср» клубы футболшы үшін 80 миллион фунт стерлинг ұсынуға дайын екендігі туралы ақпарат тараған болатын. Бұл туралы Goal.com халырлайды.
Клуб басшылығының мұндай қатаң ұстанымы маусым барысындағы өзгерістермен байланысты. Алғашында Фернандешті сатуға ниетті болған басшылар бұрынғы бас бапкер Рубен Аморимнің ұсынысы мен футболшының көшбасшылық қабілетін ескере отырып, өз ойларын өзгертті. Фернандеш желтоқсан айында берген сұхбатында клубтың оны сатуға дайын екеніне ренжігенін білдірген еді, алайда қазіргі уақытта тараптар арасындағы түсініспеушіліктер жойылды.
Қазіргі уақытта Майкл Кэрриктің баптауымен өнер көрсетіп жатқан командада Фернандеш керемет спорттық бабын байқатуда. Ол биылғы маусымда Англия Премьер-лигасында 18 нәтижелі пас беріп, жылдың үздік футболшысы жүлдесіне басты үміткерлердің бірі болып отыр. Қақпашы Сенне Ламменс капитанның жеңіске деген құштарлығы мен киім ауыстыратын бөлмедегі жоғары стандарттарын ерекше атап өтті.
Фернандештің қазіргі келісімшарты 2027 жылға дейін жасалған, сондай-ақ оны тағы бір жылға ұзарту мүмкіндігі қарастырылған. Оның келісімшартында Англиядан тыс клубтар үшін 65 миллион еуро көлемінде өтемақы көрсетілгеніне қарамастан, футболшының өзі Манчестерде бақытты екенін айтуда. Команданың турнир кестесінде үшінші орында келе жатқаны және Чемпиондар лигасына қайта оралу мүмкіндігі Фернандештің қалу туралы шешімін одан әрі нығайта түсті.
“Zamin”-ді Telegram-нан оқыңыз! 
