Февраль ўрталарда Мануэль Нойер жароҳат олиб, «Бавария» сафидан тахминан уч ҳафтага четда қолиши айтилганди. Бироқ тажрибали дарвозабон кутилганидан эрта сафга қайтиши эҳтимоли пайдо бўлди. Бу ҳақда euro-football.ru хабар беради.
Bild хабарига кўра, душанба куни Нойер майдонда дарвозабонлар мураббийи ва реабилитация бўйича мутахассис билан бирга машғулот ўтказди. Ҳозирча мураккаб юкламалар берилмаган, аммо у тўп билан ишлагани тикланиш жараёни ижобий кетаётганидан дарак беради.
Германияда Нойер аллақачон Дортмунднинг «Боруссия»сига қарши баҳсда майдонга тушиб, кўпчиликни ҳайратда қолдириши мумкинлиги ҳақида гап-сўзлар юрибди. Жамоалар 28-февраль, шанба куни тўқнаш келади.
«Бавария» Бундеслигада пешқадамлик қилмоқда, иккинчи ўриндаги «Боруссия» эса ундан саккиз очкога ортда бормоқда.
“Zamin”ни Telegram'да ўқинг!
