Manba: Kreml urush tugagach Belarusni oʻziga qoʻshib olmoqchi

Kreml Ukrainadagi urush tugaganidan keyin Belarusni Rossiyaga qoʻshib olish rejasiga qaytishi mumkin. Bu haqda prezident ma'muriyatiga yaqin manbalar Meduza’ga xabar berdi.

Ularning soʻzlariga koʻra, bu ikki davlatning umumiy hokimiyat organlari tashkil etiladigan “chuqurroq integratsiyasi” sifatida berilishi mumkin.

“Ularni tanlash, kampaniya oʻtkazish, hatto yangi rekordlarni koʻrsatish ham mumkin. Bu 1980—1990 yillarda parchalangan erlarning qayta birlashishi, respublikalar ittifoqidir”, deya tushuntirdi suhbatdoshlardan biri.

Biroq u bu stsenariyning amalga oshirilishi “butunlay Belarus prezidenti Aleksandr Lukashenkoga bogʻliq ekanini va u, shubhasiz, toʻliq huquqli hukmdor boʻlib qolishni xohlayotganini” ta'kidlab oʻtdi.

Belarusda navbatdagi prezidentlik saylovi arafasida 1994 yildan buyon mamlakat prezidenti lavozimida ishlab kelayotgan va ettinchi prezidentlik muddatiga da'vogarlik qilayotgan Lukashenko yaqin kelajakda hokimiyatni yangi avlodga topshirishga tayyorligini ma'lum qildi.

“Men bu hokimiyatni yangi avlodga sekin, xotirjam oʻtkazish uchun qoʻlimdan kelgan hamma ishni qilaman. Chunki men yangi hokimiyat davrida ham yashashga umid qilaman”, dedi Lukashenko.

Shu bilan birga, u sogʻligʻi imkon berguncha davlat lavozimida ishlashni davom ettirishini qoʻshimcha qilgan.

2024 yil dekabr oyida Lukashenko va Rossiya prezidenti Vladimir Putin oʻzaro xavfsizlik kafolatlari toʻgʻrisidagi shartnomani imzolagan edi. Hujjat, jumladan, tomonlarning mudofaa, har ikki davlatning suvereniteti, mustaqilligi va konstitutsiyaviy tuzumini himoya qilish, shuningdek, Ittifoq davlati hududining yaxlitligi va tashqi chegarasining daxlsizligini ta'minlash sohasidagi majburiyatlarini belgilaydi. Unda, shuningdek, Rossiyaning taktik yadro qurolini Belarusda joylashtirish qoidalari ham koʻrsatilgan.

Ukrainada keng koʻlamli urush boshlanishidan ancha oldin Kreml 2030 yilgacha Belarusni “asta-sekin qoʻshib olish” rejasini tayyorlagan edi. Rejaga Rossiya va Belarus qonunlarini “uygʻunlashtirish”, “kelishilgan tashqi va mudofaa siyosati”, shuningdek, Rossiya manfaatlari asosida “savdo-iqtisodiy hamkorlik” rejalari kiritilgan.

Ukrainada urush boshlanganidan soʻng Lukashenko Moskva va Minsk “ikki mustaqil davlat birligi”ni shakllantirib, birgalikda sanktsiyalarni engib oʻtishini ma'lum qilgan. Shu bilan birga, u oʻzi va Putin “Belarusni Rossiya tarkibiga qoʻshish uchun eski usullarni qoʻllaydigan darajada nodon emasliklarini” ta'kidlab oʻtgan. “Zamin” yangiliklarini “Telegram”da kuzatib boring