Keniyadagi mashhur Masai-Mara milliy qo‘riqxonasida olingan jingalak yolli sher surati internetda katta shov-shuvga sabab bo‘ldi.
Suratni yovvoyi tabiat fotografi Kambiz Kameo Purgxanad olgan bo‘lib, u uning eng noyob kadrlaridan biri sifatida ta’riflangan. Tasvirdagi sher Nzuri M6 deb ataladi — u Olepolosning o‘g‘li va ilgari Topi-Pride guruhiga mansub bo‘lgan. Hozir esa yettita sherdan iborat yangi guruh yetakchilaridan biri hisoblanadi.
Suratda sherning tabiiy jingalak yoli va o‘ziga xos qiyofasi ko‘plab ijtimoiy tarmoq foydalanuvchilarining e’tiborini tortdi. Fotografning so‘zlariga ko‘ra, “Nzuri Masai-Maradagi eng go‘zal sherlardan biri bo‘lib, Afrikadagi Bon Jovi yoki Blondi kabi ramziy jonzotlar qatoriga kirishi mumkin”.
Kambiz Kameo aslida uchuvchi bo‘lsa-da, tabiatga bo‘lgan muhabbati tufayli yillar davomida yovvoyi jonzotlarni suratga olib kelmoqda. Uning ta’kidlashicha, bu kadr “tabiatdagi eng kam uchraydigan va haqiqatan hayratlanarli go‘zalliklardan biri”dir.
Mutaxassislar fikricha, bunday fotosuratlar insonni tabiatga yanada yaqinlashtiradi va yovvoyi hayotning nafosatini qayta kashf etishga undaydi.
“Zamin”ni Telegramʻda oʻqing!
