31 oktyabr kuni Malayziya poytaxti Kuala-Lumpurda bo‘lib o‘tgan Janubi-Sharqiy Osiyo davlatlari assotsiatsiyasi (ASEAN) sammiti doirasida AQSH va Hindiston o‘rtasida yangi, tarixiy ahamiyatga ega mudofaa shartnomasi imzolandi.
Tomonlar — AQSH mudofaa vaziri Pit Hegset va Hindistonning mudofaa rahbari Rajnatx Singh — 10 yilga mo‘ljallangan strategik hamkorlik bitimiga imzo chekishdi. Hujjat ikki mamlakat o‘rtasida harbiy va texnologik sohadagi munosabatlarni yangi bosqichga olib chiqishi kutilmoqda.
Pentagon rahbari Hegsetning ta’kidlashicha, mazkur kelishuv «mintaqaviy barqarorlik va mudofaa tizimidagi tiyib turishning asosiy poydevori» sifatida xizmat qiladi. Uning so‘zlariga ko‘ra, bu hamkorlik ikki davlat armiyalari o‘rtasidagi razvedka ma’lumotlari almashinuvi, qo‘shma mashg‘ulotlar va innovatsion harbiy texnologiyalar sohasidagi hamkorlikni chuqurlashtiradi.
«Bu bizning qurolli kuchlarimiz uchun yangi yo‘l xaritasidir. U kelgusida yanada mazmunli va o‘zaro ishonchli hamkorlikni ta’minlaydi», dedi Hegset.
Hindistonlik vazir Rajnatx Singh ham uchrashuvni «samarali va tarixiy» deb baholadi. Uning fikricha, yangi kelishuv ikki davlat o‘rtasidagi munosabatlarda yangi sahifani ochadi. «Bu hujjat Hindiston va AQSH o‘rtasidagi o‘sib borayotgan strategik yaqinlikni ifoda etadi hamda Hind-Tinch okeani mintaqasi barqarorligi uchun muhim ahamiyat kasb etadi», dedi u.
Shartnoma imzolanishi ikki davlat munosabatlari ancha taranglashgan bir davrga to‘g‘ri kelmoqda.
Avvalroq AQSH prezidenti Donald Tramp Hindistonning Rossiya neftini import qilishni to‘xtatishdan bosh tortishi ortidan mamlakat eksportining bir qismiga 50 foizlik boj joriy qilgan edi. Bu qaror ortidan Nyu-Dehli Amerika harbiy texnikasini xarid qilishni vaqtincha to‘xtatgan.
Biroq so‘nggi xabarlarga ko‘ra, AQSHning Rossiya neft sektoriga nisbatan yangi cheklovlaridan keyin Hindiston Rossiyadan neft sotib olishni to‘xtatgan. Trampning aytishicha, bu haqda unga Hindiston bosh vaziri Narendra Modi shaxsan ma’lum qilgan.
Kuzatuvchilarning ta’kidlashicha, yangi mudofaa bitimi Vashington va Nyu-Dehli o‘rtasidagi uzoq muddatli ishonchni tiklash yo‘lida muhim qadam hisoblanadi. Bu hamkorlik faqat harbiy sohani emas, balki texnologik taraqqiyot va qo‘shma xavfsizlik siyosatini ham qamrab oladi.
Demak, Hindiston va AQSH munosabatlari yangi bosqichga ko‘tarilmoqda — u nafaqat ikki davlat, balki butun Hind-Tinch okeani mintaqasidagi geosiyosiy muvozanatni belgilab berishi mumkin.
“Zamin”ni Telegramʻda oʻqing!
