Xitoydagi to‘g‘on Yerning aylanishini sekinlashtirdi – NASA

Xitoyning Xubey provinsiyasida joylashgan va dunyodagi eng katta gidroelektrostansiya bo‘lgan «Uch dara» to‘g‘oni Yerning aylanish tezligiga ta’sir ko‘rsatib, kun uzoqligini cho‘zgani ma’lum bo‘ldi. Bu haqda NASA olimlari bayonot berishdi.

Yanszi daryosi ustida qurilgan mazkur ulkan inshoot 2012 yilda ishga tushirilgan bo‘lib, uning uzunligi 2335 metr, balandligi esa 185 metrga teng. To‘g‘on suv omborida qariyb 40 kub kilometr suv saqlanadi, bu esa 38 trillion litr degani. Bunday hajmdagi suv dengiz sathidan 175 metr balandlikda joylashtirilgan.

NASA vakili doktor Benjamin Fong Chaoning ta’kidlashicha, to‘g‘on ta’sirida Yer sayyorasidagi massa taqsimoti o‘zgargan va bu o‘z navbatida, sayyoraning aylanishini sekinlashtirib, kunni 0,06 mikrosekundga uzaytirgan. Shuningdek, Yer o‘qining holati ham 2 santimetrga siljigan. Garchi o‘zgarishlar juda kichik bo‘lsa-da, zamonaviy qurilmalar ularni aniqlashga qodir.

Bu kabi global miqyosdagi ta’sirni ko‘rsatgan «Uch dara» to‘g‘oni yer yuzida qurilgan eng yirik muhandislik mo‘jizalaridan biri hisoblanadi va uning atrof-muhitga ta’siri muhokama qilinmoqda. NASA'ning bu ma’lumoti jamoatchilik e’tiborini yanada orttirdi.

Xitoylik olimlar esa mazkur inshoot mintaqaning energiya ta’minotida muhim ahamiyat kasb etishini va millionlab insonlar hayotini yaxshilaganini ta’kidlashmoqda. Ammo atrof-muhit himoyachilari to‘g‘onning tabiatga uzoq muddatli ta’siri haqida xavotirlarini bildirishda davom etishmoqda.

Dunyodagi eng yirik gidroelektrostansiya Yer sayyorasiga qanday ta’sir ko‘rsatganiga guvoh bo‘lish juda ajoyib va o‘ylantirarlidir. Bunday qurilishlar kelgusida yana qanday o‘zgarishlarni keltirib chiqarishi mumkinligini vaqt ko‘rsatadi. “Zamin”ni Telegramʻda oʻqing!