Toshkent viloyatida internet orqali yuzlab fuqarolarni aldagan kiberguruh fosh etildi, deb xabar berdi Ichki ishlar bosh boshqarmasi.
Ma’lumotlarga ko‘ra, “Telegram” va “Instagram” orqali “limitlash xizmati” taklif qilgan to‘rt nafar shaxs jami 600 ga yaqin fuqaroning 1 milliard so‘mdan ortiq mablag‘ini o‘zlashtirgan.
2005 yilda tug‘ilgan B.N. va uning sheriklari mikromoliya tashkilotlaridan olingan kredit limitlarini “naqd qilib berish”ni va’da qilgan. Ular fuqarolarning ishonchidan foydalanib, o‘zlari tashkil etgan firma orqali onlayn savdo platformalarida operatsiyalar amalga oshirgan va mablag‘larni shaxsiy foydasiga yo‘naltirgan.
Tezkor choralar natijasida guruh faoliyatiga chek qo‘yildi. Hozirda ularga nisbatan Jinoyat kodeksining 168-moddasi 4-qismi “a” bandi (firibgarlik) bo‘yicha ish qo‘zg‘atilgan.
Gumonlanuvchilar qamoqqa olingan, tergov jarayonida zararni qoplash va boshqa ishtirokchilarni aniqlash ishlari davom etmoqda.
“Zamin”ni Telegramʻda oʻqing!
