NASA Marsni o‘zlashtirish rejasini tezlashtirmoqda: Ilon Mask ham ushbu loyihada ishtirok etishi mumkin!

Koinot tadqiqotlari sohasidagi eng yirik tashkilotlardan biri bo‘lgan NASA yaqin yillar ichida Marsga raketa parvozlarini amalga oshirish uchun turli imkoniyatlarni ko‘rib chiqmoqda. Bu haqda agentlik matbuot kotibi Betani Stivens ma’lumotiga tayangan holda Politico nashri xabar berdi.

Stivensning so‘zlariga ko‘ra, agentlik mutaxassislari 2026 va 2028 yillardagi qulay "parvoz darchalari"dan foydalanib, Marsga odamlarni qo‘ndirishga imkon yaratadigan yangi texnologiyalarni amalda sinab ko‘rishni rejalashtirmoqda.

Bu yillar tanlanishining asosiy sababi Yer va Qizil sayyora aynan shu paytda bir-biriga nisbatan maksimal darajada yaqinlashadi va kosmik parvozlarni amalga oshirish uchun eng qulay sharoit yuzaga keladi. Bu esa Marsgacha bo‘lgan masofa va vaqtni sezilarli darajada qisqartirish imkonini beradi.

Ammo NASA'ning ushbu bayonoti agentlik uchun ustuvor yo‘nalishlarning o‘zgarayotganidan darak berishi ham mumkin. Bundan avval AQSH Kongressi NASA'ga birinchi navbatda Oyni o‘rganish va u yerda insonlarning uzoq muddat qolishini ta’minlash majburiyatini yuklagan edi. Shu sababli, Marsga qaratilgan yangi harajatlarni Kongress tasdiqlashdan bosh tortishi ehtimoli mavjud.

Politico nashri NASA'ning ushbu yangi rejalari haqida agentlik xodimlari ham ko‘p narsani bilmasligini ta’kidlamoqda. NASA'dagi bir qator manbalar agentlikning ustuvor maqsadlari o‘zgargani haqida ma’lumotga ega emasliklarini bildirishgan.

Biroq NASA'ning yangi rejasi amalga oshsa, bu vaziyat koinot sohasidagi xususiy kompaniyalar, ayniqsa Ilon Maskka tegishli bo‘lgan SpaceX uchun katta imkoniyat eshiklarini ochishi mumkin. Chunki Marsga parvozlar uchun NASA aynan SpaceX kompaniyasining Starship raketalaridan foydalanishi ehtimoli yuqori baholanmoqda.

Eslatib o‘tamiz, Ilon Mask avvalroq 2026 yil oxirida odamsimon Optimus robotlari bilan jihozlangan Starship koinot kemasini Marsga jo‘natish rejasini e’lon qilgan edi. Agar ushbu parvoz reja bo‘yicha muvaffaqiyatli amalga oshsa, insonlar Marsga ilk bor 2029 yildayoq qadam qo‘yishi mumkin.

Shunday qilib, NASA va SpaceX hamkorligi natijasida insonlarning Marsga ilk bor borishi kutilganidan ham ertaroq ro‘y berishi ehtimoli mavjud. Bu esa butun insoniyat uchun yangi davrni boshlab berishi va kosmosni o‘zlashtirish jarayonini keskin tezlashtirishi mumkin.

Marsga parvoz qilish bo‘yicha mazkur rejalar amalda qanchalik muvaffaqiyatli bo‘lishini esa vaqt ko‘rsatadi. Ammo hozircha ushbu yangilik butun dunyo bo‘ylab astronomiya va koinotga qiziquvchilarning diqqatini o‘ziga jalb etib ulgurdi.

Zamin.uz sayti bilan birga bu muhim voqelikning keyingi rivojini kuzatib boring! “Zamin”ni Telegramʻda oʻqing!