Afrika qit’asida kolera epidemiyasi keng miqyosda tarqalmoqda, deb xabar berdi Afrika CDC.
2025 yil boshidan buyon kontinentda 23 mamlakatda infeksiya aniqlangan. Rasmiy ma’lumotlarga ko‘ra, jami 297 mingdan ortiq kishi kasallangan, shulardan qariyb 7 ming nafar bemor hayotdan ko‘z yumgan. Bu holat o‘lim darajasini 2,3 foizga yetkazgan.
Eng og‘ir vaziyat Angola va Burundida kuzatilmoqda. Mutasaddilar bu mamlakatlarda sanitariya tizimidagi muammolar va toza ichimlik suvining tanqisligi vaziyatni yanada og‘irlashtirayotganini ta’kidlamoqda.
Janubiy Sudan, Sudan va Kongo Demokratik Respublikasida oxirgi haftalarda kasallanish holatlari biroz kamaygan bo‘lsa-da, bu davlatlar hamon yuqori xavf guruhiga kiradi. Muttaxassislar kuchli yomg‘irlar sabab epidemiya yil oxirigacha yana kengayishi mumkinligini ogohlantirmoqda.
Kolera — Vibrio cholerae bakteriyasi orqali yuqadigan ichak infeksiyasi bo‘lib, asosan iflos suv yoki oziq-ovqat vositasida tarqaladi.
Jahon bo‘yicha esa 32 mamlakatda 518 mingdan ziyod holat qayd etilgan, shulardan 6,5 mingdan ortiq kishi vafot etgan.
Tabiblar aholini gigiyena qoidalariga qat’iy rioya etishga, faqat toza ichimlik suvidan foydalanishga va shubhali oziq-ovqat mahsulotlaridan ehtiyot bo‘lishga chaqirmoqda. Sog‘liqni saqlash tizimlariga esa epidemiyaga qarshi tezkor choralarni kuchaytirish tavsiya etilmoqda.
“Zamin”ni Telegramʻda oʻqing!
