Aslida kimsiz: “yechimtopar” optimistmi yoki “sernola” pessimist?

Tong saharda turib qarasangiz, chap yoningiz bilan uyg‘ongansiz. Baxtga qarshi kuni bo‘yi omad sizdan yuz o‘giradi. Shoshilganingizdan nimanidir unutasiz, avtobusga ulgurmay qolasiz, ishga kechikib, rahbaringizdan gap eshitasiz.
Hammasiga chap yon bilan turganingiz sabab… Agar tongda o‘ng taraf bilan uyg‘onganingizda edi, hammasi boshqacha bo‘larmidi? Balki lavozimingiz oshib, kamida oyligingizga mukofot puli ham qo‘shib berisharmidi?

Yo‘q, albatta! Biz bunday vaziyatda bugun kunim yomon o‘tadi, deb o‘zimizni ishontiramiz. Shuning uchun arzimagan ko‘ngilsizliklar ham katta omadsizlik bo‘lib tuyuladi.
Ularni bartaraf qilish o‘rniga nolib, o‘zimizni kuni bo‘yi koyib yuramiz. Bu esa o‘z-o‘zidan ishimiz va kayfiyatimizga salbiy ta’sir qiladi. Shu sababli, “Nega men omadsizman?”, “Nega ishlarim doimo teskarisiga ketadi?” degan savollar tug‘iladi.

O‘zbekiston kanalida muntazam berib boriladigan “Oydin hayot” ko‘rsatuvida ishtirok etgan bir psixologning intervyusi diqqatga sazovor. U shunday dedi: “Tasavvur qiling, qurilish bo‘layotgan joydan o‘tayotgan yo‘lovchining oyog‘iga g‘isht tushib ketdi.
U pessimist bo‘lsa, “Eh, nega men omadsizman, doimo men bilan bir falokat ro‘y beradi” deb o‘zini qiynaydi. Agar o‘sha shaxs optimist bo‘lsa, “Qanday omadli inson ekanman. Shu g‘isht boshimga tushsa nima qilardim”, deb o‘zini yupatadi”.

Endi tanlang, hayotda qaysi toifadagi shaxs bo‘lib yashash oson: optimist bo‘lib qiyinchiliklarni yengishmi yoki pessimist bo‘lib nolib yashashmi?
Mashhur bir filmda shunday jumla mavjud: “Agar boshingga biror tashvish tushsa, qo‘lingni ko‘ksingga qo‘yib “hammasi yaxshi” deb unga dalda ber. To‘g‘ri, bu bilan muammo hal bo‘lib qolmaydi, biroq yurak xotirjam bo‘lib, bardoshliroq bo‘lishga kuch topadi”.
Inson yaralibdiki, tashvish-u muammolar qurshovida yashaydi. Hayotingizda qiyin kunlar boshlandimi, atrofingizga nazar soling. Unda sizdanda qiyin vaziyatdagi insonlarning ko‘pligini ko‘rib shukuronalik hissini tuyushingiz tabiiy.

Aynan mana shu shukuronalik bizni himoya qiluvchi ulkan toqqa aylanadi. Yo‘q narsalarni topish uchun o‘zinmizda borini qurbon qilgandan ko‘ra, borlarini qadrlab yashagan yaxshiroq.
Buyuk siyosatchi Martin Lyuter Kingning shunday mashhur gapi bor: “Siz shuni istaganingiz uchun ham, o‘sha voqea sodir bo‘ladi”. Agar biz biror bir narsani chin dildan xohlab, maqsad sari dadil qadam tashlasak, albatta, unga erishamiz”.

Kemaning eng arzon toifasiga kiruvchi o‘rindiqlarda qisinib o‘tirgancha AQShga kelgan bir yigit ozodlik haykaliga boqib, “Men seni baribir zabt etaman, Amerika!” deb qichqirgan edi. O‘sha yigit keyinchalik Charli Chaplin nomi bilan butun dunyoni zabt etdi.
Hayotda insonni baxtli bo‘lishi uchun nima kerak, degan savolga hamma har xil javob beradi. Kimdir sog‘lik, kimdir oilaviy xotirjamlik, yana kimdir mo‘maygina daromad. O‘zida bor narsaga shukur qilgan va ularni qadrlagan insondan baxtliroq odam yo‘q aslida.

Manba: Qalampir.uz “Zamin” yangiliklarini “Facebook”da kuzatib boring