Ob-havo mutaxassislari yangi haftada mamlakatimizda keskin o‘zgarishlar bo‘lishini ma’lum qilmoqda. "O‘zgidromet" matbuot xizmati tarqatgan ma’lumotlarga ko‘ra, O‘zbekiston hududi Qozog‘iston janubida shakllangan baland tog‘li siklon ta’sirida qoladi. Bu esa sovuq va nam havo oqimlari kirib kelishiga olib kelishi aytilmoqda.
15 sentyabr kunidan boshlab ayrim hududlarda qisqa muddatli yomg‘ir yog‘ishi va momaqaldiroq kuzatilishi ehtimoli katta. Jumladan, Navoiy viloyatining shimoliy qismida kunning birinchi yarmida yomg‘ir yog‘ishi mumkin. Shu kuni kechqurun va ertasiga o‘tar kechasi Toshkent viloyatining ayrim hududlarida ham qisqa muddatli yomg‘ir yog‘ib, ko‘kdan chaqmoq chaqishi ehtimol qilinmoqda.
Farg‘ona vodiysi aholisi esa 16 sentyabr kechqurundan 19 sentyabr ertalabkacha davomida yomg‘irli kunlarga tayyorgarlik ko‘rishi kerak bo‘ladi. Qolgan viloyatlarda esa yog‘ingarchilik kutilmaydi. Biroq tog‘ oldi va baland tog‘li hududlarda butun ish haftasi davomida tinimsiz yomg‘irlar yog‘ishi va ayrim joylarda kuchli yomg‘ir kuzatilishi ta’kidlanmoqda. Ob-havo mutaxassislarining ogohlantirishicha, ba’zi baland hududlarda yomg‘ir qorga aylanishi ham mumkin.
Harorat keskin pasayishi kutilmoqda. 16–18 sentyabr kunlari kunduzgi harorat 20–25 darajagacha tushishi, 19 sentyabrdan esa salqin havo massalari chekina boshlab, harorat yana 2–3 darajaga ko‘tarilishi ma’lum qilindi. Bu jarayon aholi uchun ham sezilarli bo‘ladi: tonggi soatlarda salqinlik kuchayib, kechqurunlarda qo‘shimcha kiyimsiz ko‘chaga chiqish noqulay bo‘lishi mumkin.
Shamol tezligi ham ba’zi joylarda keskin oshishi mumkin. Mutaxassislar ma’lum qilishicha, respublika bo‘ylab ayrim hududlarda shamol sekundiga 13–18 metrgacha kuchayishi kutilmoqda. Bu esa chang-to‘zon ko‘tarilishiga sabab bo‘lishi ehtimolini oshiradi.
Toshkent shahri aholisi uchun esa prognoz nisbatan qulay. Havo asosan quruq bo‘ladi, faqat 15 sentyabr kechqurun, shuningdek, 16 sentyabr kechasi va ertalab qisqa muddatli yomg‘ir yog‘ishi mumkin. Shamol shimoli-sharq yo‘nalishidan 3–8 m/s tezlikda esadi, ayrim vaqtlarda 10–12 m/s gacha kuchayishi mumkin. Harorat esa 16–18 sentyabr kunlari 20–25 darajagacha pasayib, 19 sentyabr kuni yana 25–27 daraja atrofida bo‘lishi kutilmoqda.
Ob-havodagi bunday keskin o‘zgarishlar hafta davomida aholi turmush tarziga ham ta’sir ko‘rsatishi mumkin. Xususan, dala ishlari bilan band kishilar, yo‘llarda harakatlanuvchi haydovchilar va tog‘li hududlarda sayohatga chiqqanlar xavfsizlik choralariga jiddiy e’tibor qaratishlari lozim.
Kutilmagan qor aralash yomg‘irlar esa bu yilgi kuz mavsumining boshqalaridan farq qilib, barvaqt sovuqlik bilan kirib kelayotganidan darak bermoqda.
“Zamin”ni Telegramʻda oʻqing!
