O'zbekistonda Fanlar akademiyasi (FA) faoliyatini takomillashtirish bo'yicha yangi chora-tadbirlar tasdiqlandi. Adliya vazirligi ma'lumotiga ko'ra, islohotlar ilmiy tadqiqotlar samaradorligini kuchaytirish va ularning iqtisodiyot uchun amaliy natijasini oshirishga qaratilgan. Bu haqda kursiv.uz xabar beradi.
Islohotlarning asosiy yo'nalishi — fanni natijadorlikka asoslangan modelga o'tkazish. Rejalarga ko'ra, yangi ilmiy ishlanmalar soni uch baravar ko'paytiriladi, ularni tijoratlashtirishdan olinadigan daromadlar hajmi ham sezilarli oshiriladi.
Kadrlar siyosatida ham yangilanish ko'zda tutilgan: yosh olimlar ulushini 60% ga yetkazish, xorijda faoliyat yuritayotgan mutaxassislarni esa milliy ilmiy tizimga jalb etish rejalashtirilgan.
Ilm-fan va iqtisodiyot o'rtasidagi barqaror hamkorlikni yo'lga qo'yish uchun Fan va sanoat integratsiyasi kengashi tashkil etiladi. Kengash ilmiy ishlanmalarni ishlab chiqarishga tatbiq etish mexanizmlarini rivojlantirish bilan shug'ullanadi.
2026 yildan davlat dasturlari doirasidagi barcha ilmiy loyihalar ekspertizasiga Fanlar akademiyasi vakillari ilmiy-texnik kengashlarga hamrais sifatida jalb qilinadi. Bu tadqiqotlarni tanlash va amalga oshirish sifatini oshirishga xizmat qilishi kutilmoqda.
Kelasi yildan Fanlar akademiyasi fondi ham ish boshlaydi. Fond mablag'lari ilmiy izlanishlarni moliyalashtirish, yosh olimlarni qo'llab-quvvatlash hamda fundamental va amaliy fanlarning ustuvor yo'nalishlarini rivojlantirishga yo'naltiriladi.
2026 yil 1 apreldan ilmiy muassasalar samaradorligini reyting asosida baholash tizimi va ilmiy xodimlar uchun individual natijadorlik ko'rsatkichlari (KPI) joriy etiladi. Baholash jarayoniga xorijiy ekspertlar ham jalb qilinadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
