Zamonaviy uy bekasi… U qanday bo‘lishi kerak?

Aksariyat uy bekalari turmushga chiqqanida qanday bo‘lsa, shundayligicha qolaveradi. Va buni me’yoriy holat deb hisoblaydi. Holbuki, barcha kasbdagi ayollar kabi uy bekalari ham o‘zini o‘zi hamisha tarbiyalab, mukammallashtirib bormog‘i zarur.

Quyidagi tavsiyalar ana shunday tarbiya jarayonida sizga asqotadi, deb umid qilamiz.

Zamonaviy uy bekasi eng avvalo, oqila, saranjom-sarishta, ozoda va rejali, asosiysi, pazanda bo‘lishi lozim. Ayolning bunday fazilatlari erkaklar uchun juda muhim!

Ularni ko‘proq tinglang. Ayol turmush o‘rtog‘iga yaxshi suhbatdosh bo‘lishi, uni ko‘proq tinglab, kamroq gapirishi, o‘z qiziqishi va mashg‘ulotlari haqida so‘zlashiga imkon yaratib berishi lozim. Bu kamtarlik va hurmat belgisidir.

Bahslashuvlardan imkon qadar qoching. Erkaklar ba’zan birdan jahl otiga minishadi. Bunday paytda ko‘zyoshi yordam bermaydi, aksincha, bu holat turmush o‘rtog‘ingizni asabiylashtiradi, xolos. O‘z fikrini bildirmay mum tishlab o‘tiraverish ham yaxshi emas. Agar siz sabrli bo‘lsangiz, eringizning jahldan tushishini kutib, vaziyat yumshagandan so‘ng o‘z fikringizni yotig‘i bilan tushuntirsangiz, olam guliston!

Oilada ba’zan kelishmovchiliklar bo‘lib turishi tabiiy hol. Chunki siz turfa toifadagi kishilarsiz, fikrlaringiz ham turlicha! Nizolarga oqilalik bilan echim izlang. Ovozingizni balandlatib, eringizdan ustun bo‘lishga urinmang. Shunday yo‘l tutsangiz, atrofdagilarning hurmatini qozonasiz. Bir gapdan qolsangiz, umr yo‘ldoshingizning sizga bo‘lgan mehri ortadi.

Turmush o‘rtog‘ingizni u qanday bo‘lsa shundayligicha qabul qiling. Uni bo‘lar-bo‘lmasga tanqid qilavermang. Idealingizdagi erkak qanday bo‘lishidan qat’i nazar, har bir inson o‘ziga xos bir xilqat ekanligini unutmang. Umr yo‘ldoshingizdan fazilat topishga urining. Eringizning sizga yoqmaydigan odatlari haqida o‘ziga yotig‘i bilan gapiring. O‘rinsiz to‘qnashuvlardan tiyiling.

Do‘stlaringiz bo‘lsin. Uy bekalari ko‘pincha do‘stona munosabatlardan uzoqlashib ketadilar. Aslida do‘stlar bilan goh-gohida uchrashib, suhbatlashib turish, insonga yaxshi kayfiyat bag‘ishlaydi.

Qiziqarli mashg‘ulotingiz bo‘lsin. Uy yumushlaridan tashqari o‘zingizga yoqadigan, undan zavq oladigan biror mashg‘ulot bilan ham shug‘ullaning. Masalan, tikuvchilik, to‘quvchilik yoki qandolatchilik bilan mashg‘ul bo‘lsangiz, ham oilangiz byudjetiga foyda, ham o‘zingiz zerikish nimaligini bilmaysiz. Hayotdan, har bir kuningizdan zavqlanib yashaysiz.

Oliy ma’lumotingiz bo‘lmasa institutga kirish haqida o‘ylang. Uy bekasi uchun oliy ma’lumot olish shart emas, deb o‘ylasangiz, adashasiz. Bu farzandlaringiz tarbiyasi, kamoloti uchun ham juda zarur. Imkoningiz bo‘lsa, albatta, bilimingizni mukammallashtiring, hech bo‘lmaganda kitob, gazeta va jurnal o‘qing. Mutolaa yaxshi ustoz, do‘st, maslahatgo‘y, u o‘zingizga bo‘lgan ishonchni shakllantiradi, dunyoqarashingizni kengaytiradi, bilimingizni boyitadi. Turmush o‘rtog‘ingiz, farzandlaringiz oldida hurmatingizni oshiradi.

Gap tashimang. Oilangizdagi gapni ko‘chaga olib chiqmang, muammolarni hech kim bilan o‘rtoqlashmang. Ota-onangizga, yaqinlaringizga aytsangiz, siqilgani qoladi, muammolaringizni hal qilib bera olmaydi. Ularga o‘zingiz echim izlang.

Uyingizdagi osoyishtalikni saqlashga intiling. Mumtoz kuy va qo‘shiqlarni ko‘proq tinglang, asablaringiz tinchlanadi. Farzandlaringiz qalbida ham bunday kuy va qo‘shiqlarga mehr uyg‘oting. Bunday holat osoyishtalik hukm surishiga hissa qo‘shadi.

Sport bilan albatta, shug‘ullaning. Imkon topolsangiz, sport zallariga boring. Imkoniyat bo‘lmasa, internet orqali videomashg‘ulotlar toping va uyda shug‘ullaning. Buning ham ilojini topolmasangiz, kechki payt ko‘proq piyoda sayr qiling. Bu salomatligingiz uchun juda zarur.

Tanaffus qiling. Rejali uy bekasi uy yumushlaridan ortib, yaqinlari bilan uchrashish, farzandlari bilan dam olish, sayohatlarga, istirohat bog‘lariga borish uchun ham fursat topadi. Ana shunda yaqinlaringizning sizga bo‘lgan mehri yanada ortadi.

Birinchi yordam ko‘rsatishni o‘rganing. Bu oila a’zolaringiz salomatligi uchun juda muhim. Biror yaqiningizning salomatligi bilan bog‘liq tasodifiy noxushlik sodir bo‘lsa, “Tez yordam”ning yo‘liga ko‘z tikishdan yomoni yo‘q. Madadga muhtoj kishiga yordam berolmayotganingizdan o‘zingiz ko‘proq azoblanasiz.

Uy yumushlari, oila a’zolaringiz bilan muomala-munosabat, mehmon kutib-kuzatish – hammasini ish sifatida qabul qiling va hamisha bu vazifalarni hafsala, did, mas’uliyat bilan ado etishga harakat qiling!

Manba: Mulohaza.uz “Zamin” yangiliklarini “Youtube”da kuzatib boring