Namangan viloyatida avtomobillarga yonilg‘i quyish shoxobchasida ro‘y bergan portlash bir insonning hayotiga zomin bo‘ldi, deb xabar berdi viloyat FVB.
Ma’lumotlarga ko‘ra, fojia 25 oktyabr kuni soat 18:47 da Chust tumani “Birlik” mahallasida sodir bo‘lgan. Faoliyati vaqtincha to‘xtatilgan yonilg‘i quyish shoxobchasida 10 tonnali yonilg‘i saqlash sisternasini boshqa joyga ko‘chirish ishlari olib borilayotgan bo‘lgan.
Dastlabki ma’lumotga ko‘ra, ish jarayonida yong‘in xavfsizligi talablari buzilgan va natijada chaqnash sodir bo‘lgan.
Payvandlash ishlarini bajarayotgan ishchi olingan jarohatlar sabab voqea joyida halok bo‘lgan.
Favqulodda vaziyatlar xizmati uchta yong‘in-qutqaruv bo‘linmasi bilan voqea joyiga yetgan va yong‘in tarqalishining oldi o‘z vaqtida olingan.
Hozirda portlashning aniq sabablari va yetkazilgan moddiy zarar miqdori o‘rganilmoqda.
“Zamin”ni Telegramʻda oʻqing!
