Abdulaziz Komilov qaerda va Tashqi ishlar vazirligi kelajagi nima boʻladi?

^{Foto: «Daryo»}
Ijtimoiy tarmoqlarda Tashqi ishlar vazirligi hamda Investitsiyalar va tashqi savdo vazirligi birlashtirilishi haqidagi tasdiqlanmagan xabar ortidan muhokamalar davom etmoqda. Ammo ikki vazirlik biror axborot berishga shoshilmayapti.

«Gazeta.uz» jurnalisti Shuhrat Latipov 19 aprel kuni oʻz manbalariga tayanib, Tashqi ishlar vazirligi hamda Investitsiyalar va tashqi savdo vazirligi yagona organga birlashtirilishi, yangi vazirlikka Sardor Umurzoqov rahbar boʻlishi kutilayotgani haqida xabar tarqatdi. Uning yozishicha, hozirda birlashish toʻgʻrisidagi tegishli hujjat Prezident administratsiyasi tomonidan ishlab chiqilmoqda.

«Hozircha bu ma'lumotning rasmiy tasdigʻi yoʻq. Soʻrovimga javoban Investitsiyalar va tashqi savdo vazirligidagilar bu ma'lumotni na tasdiqlovchi, na rad etuvchi fakt yoʻqligi uchun izoh bera olmasligini aytdi. Tashqi ishlar vazirligi ham soʻrovga javob bermadi», – deb yozgan jurnalist.

«Daryo» mazkur xabar yuzasidan ikki vazirlik axborot xizmatlari bilan bogʻlandi. Ammo yuqoridagi javoblar olindi.

Tashqi ishlar vazirligi axborot xizmatidan ma'lum qilinishicha, vazir Abdulaziz Komilov qaerda ekani va vazirlik kelajagi nima boʻlishi haqidagi savollar juda koʻp berilmoqda.

«Hammada shu savol. Bizda biror ma'lumot boʻlganda oʻzimizning kanalga ham joylamoqchi edik. Lekin bu haqda ma'lumotlar yoʻq», — dedi axborot xizmati vakili.

Investitsiya va tashqi savdo vazirligi axborot xizmatidan ham shu mazmundagi javob olindi.
«Hozircha bizda bu haqda hech qanday ma'lumot yoʻq. Yangilik boʻlib qolsa, xabar beramiz», — dedi vazirlik vakili.

Bu kabi muhim masalada hukumat sukut saqlayotgani sababli jamoatchilik turli fikrlarni bildira boshlagan. Jumladan, Telegram’dagi «Davletov.uz» kanali muallifi vazirliklarni qoʻshib yuborish boʻyicha «eksperiment»larni Tashqi ishlar vazirligiga nisbatan qoʻllamagan ma'qulligini yozgan.

Toʻgʻri, Oʻzbekistonda vazirlik tuzish, ularni bir-biriga qoʻshish va ajratishdan oson ish yoʻq boʻlib qoldi. Bunga 2016 yildan beri bir necha marta oʻzgargan vazirlik va idoralar, yangi tashkil etilib, tugatib yuborilgan agentliklar yaqqol misol boʻladi.

Lekin nazarimizda, Oʻzbekistonning mintaqadagi siyosiy oʻrni va qaysidir ma'noda mamlakatni himoya qilib kelayotgan Tashqi siyosiy faoliyat kontseptsiyasi printsiplaridan kelib chiqqan holda yuqoridagi «eksperiment»larni Tashqi ishlar vazirligiga nisbatan qoʻllamagan ma'qul. Chunki hozirgi sharoitda vorisiylikni ta'minlash, mavjud va qimmatli kontaktlarni saqlab qolish juda muhim. Afgʻonistondagi beqarorlik, Pokistondagi siyosiy kuchlarning oʻzgarishi, Ukraina urushi tashqi siyosatda yanada e'tiborli boʻlishni talab qiladi.

Diplomatiya sokinlikni xush koʻradi. Iqtisodiy diplomatiyaning hozirgi ritmini saqlagan holda puxta-pishiq, oqibatlarini inobatga olgan holda qaror qilish kerak boʻladi. Keyin yana bir narsa borki, dunyo tajribasida Tashqi ishlar vazirligi qancha oʻzgartirilmasin, yana koʻp oʻtmay eski maqomiga qaytib kelavergan. Bizda ham xuddi shunday boʻlishi aniq. Va oxirgisi, tashqi siyosat mahkamasidagi oʻzgarishlar senatdagi bayonot natijasi sifatida tarixda qolmasligi kerak, hech qursa.

Tashqi ishlar vaziri Abdulaziz Komilov 17 mart kuni Senatdagi chiqishida Ukraina va Rossiya oʻrtasidagi mojaro yuzasidan Oʻzbekiston pozitsiyasi haqida gapirgandi. Oʻshanda vazir Ukraina atrofidagi vaziyat Oʻzbekistonda jiddiy xavotir uygʻotayotgani, masala tinch yoʻl bilan hal qilinishi kerakligini aytgandi.

«Birinchi navbatda harbiy harakatlar, zoʻravonliklar zudlik bilan toʻxtatilishi zarur. Oʻzbekiston Ukraina mustaqilligi, suvereniteti va hududiy yaxlitligini tan oladi. Biz Lugansk va Donetsk mustaqilligini tan olmadik», – degan edi Abdulaziz Komilov.

18 mart kuni Abdulaziz Komilov Koreya va Dominikana Respublikalari elchilarini qabul qilgandi. Shundan soʻng vazir jamoatchilikka koʻrinish bermay kelmoqda. Senat ham oʻsha voqeadan soʻng majlislarni jonli efirga uzatishni toʻxtatib qoʻygani aytilmoqda.

Ijtimoiy tarmoqlarda vazir va vazirlik kelajagi haqida muhokamalar, turli tasdiqlanmagan xabarlar yangray boshlagan.

29 mart kuni Tashqi ishlar vazirligi matbuot xizmati Abdulaziz Komilov davolanish uchun xorijga joʻnab ketganini ma'lum qildi. Xabarda vazir bungacha 10 kun davomida Tibbiyot bosh boshqarmasining 1-son Markaziy klinik shifoxonasida tibbiy muolajalar olgani aytilgan.

Oʻtgan vaqt davomida ikki vazirlik birlashuvidan tuzilgan yangi organ rahbarligiga nomzodi keltirilayotgan Bosh vazir oʻrinbosari, Investitsiyalar va tashqi savdo vaziri Sardor Umurzoqov tashqi ishlar vazirliklari doirasidagi xalqaro uchrashuvlarda Oʻzbekiston nomidan qatnashib kelmoqda. Jumladan, 30—31 mart kunlari Xitoyda boʻlib oʻtgan Afgʻonistonga qoʻshni mamlakatlar vazirlarining uchrashuvida Oʻzbekiston hukumati nomidan Sardor Umrzoqov qatnashgan. Shuningdek, 15 aprel kuni boʻlib oʻtgan «Markaziy Osiyo + Yaponiya» muloqoti tashqi ishlar vazirlarining 8-yigʻilishida ham bosh vazir oʻrinbosari — investitsiyalar va tashqi savdo vaziri ishtirok etgan.

Ma'lumot uchun, Abdulaziz Komilov 2012 yildan beri Oʻzbekiston tashki ishlar vaziri sifatida faoliyat yuritib kelmoqda.

Sardor Umurzoqov esa bosh vazirning investitsiyalar va tashqi iqtisodiy aloqalar masalalari boʻyicha oʻrinbosari (2020 yildan beri), investitsiyalar va tashqi savdo vaziri (2019 yildan beri) lavozimlarida ishlab kelmoqda. “Zamin” yangiliklarini “Telegram”da kuzatib boring