1 yanvardan 15 turdagi hujjat va ma’lumotlarni so‘rash tartibi bekor qilindi

O‘zbekistonda 2022 yil 1 yanvardan aholi va tadbirkorlardan 15 turdagi hujjat va ma’lumotlarni so‘rash tartibi bekor qilindi. Bu boradagi «Davlat xizmatlarini ko‘rsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari to‘g‘risida»gi prezident farmoni 2021 yilning iyulida imzolangan edi.

Hujjatga ko‘ra, 2022 yil 1 yanvardan boshlab davlat organlari tomonidan aholidan, shu jumladan, tadbirkorlik sub’ektlaridan ayrim hujjat va ma’lumotlarni talab qilish tartibi bekor qilindi.

Quyidagi hujjatlarni:
- moliyaviy hisobotlar nusxalari;
- jismoniy shaxslarning oxirgi 12 oydagi ish haqini tasdiqlovchi ma’lumotnomalar;
- ijtimoiy nafaqa va pensiyalar to‘langanligi to‘g‘risidagi ma’lumotnomalarni so‘rash bekor bo‘ladi.

Quyidagi faktlarni tasdiqlovchi ma’lumotlarni:

• tadbirkorlik sub’ekti davlat ro‘yxatidan o‘tkazilganligi to‘g‘risidagi guvohnoma ma’lumotlari;
  
• litsenziya, ruxsat etish xususiyatiga ega hujjatlar va xabarnomalar qabul qilinganligi to‘g‘risida tasdiqnoma mavjudligi bo‘yicha ma’lumotlar;
  
• davlat boji, yig‘imlar va boshqa to‘lovlar to‘langanligi to‘g‘risida ma’lumotlar;
  
• qimmatli qog‘ozlar, qimmatli qog‘ozlar bilan amalga oshirilgan operatsiyalar, dividendlar olinganligi to‘g‘risidagi ma’lumotlar;
  
• kam ta’minlangan oila yoki oila a’zosi sifatida ro‘yxatga olinganligi to‘g‘risida ma’lumotlar;
  
• jismoniy shaxslar tomonidan to‘langan va olingan alimentlar to‘g‘risida ma’lumotlar;
  
• oliy ma’lumot to‘g‘risidagi diplom ma’lumotlari;
  
• jismoniy shaxs o‘rta maxsus, kasb-hunar ta’limi muassasasini tugatganligi haqida ma’lumotlar;
  
• jismoniy shaxs umumiy o‘rta ta’lim (11-sinf negizida) muassasasini tugatganligi haqida ma’lumotlar;
  
• fuqaro «yoshlar daftari» yoki «ayollar daftari»da mavjudligi to‘g‘risida ma’lumotlar;
  
• o‘zini o‘zi band qilgan shaxslar to‘g‘risida ma’lumotlar;
  
• oliy ta’lim muassasalariga o‘qishga kirish uchun imtiyozga ega bo‘lgan abituriyentlarning imtiyoz huquqini tasdiqlovchi hujjat to‘g‘risida ma’lumotlarni talab qilish bekor qilinadi.

Bunda davlat organlari va tashkilotlari jismoniy shaxslarga davlat xizmatlarini ko‘rsatishda, ishga qabul qilish jarayonida va boshqa ma’muriy tartib-taomillarni amalga oshirishda yuqoridagi hujjat va ma’lumotlarni belgilangan mas’ul davlat organlari va tashkilotlaridan mustaqil ravishda «Elektron hukumat» tizimi idoralararo integratsiyalashuv platformasi orqali so‘rab oladi. “Zamin” yangiliklarini “Twitter”da kuzatib boring