Superliganing 28-turidan o‘rin olgan uchrashuvda Qarshining “Markaziy” stadionida kutilmagan natija qayd etildi — “Nasaf” o‘z uyida “Mash’al”ga 1:2 hisobida mag‘lub bo‘ldi. Bu g‘alaba miriqib kurashgan “gazchilar” uchun qimmatli ochkolarni taqdim etdi, “ajdarlar” esa chempionlik uchun kurashda jiddiy yo‘qotishga uchradi.
Bellashuv boshidanoq jadal ruhda o‘tdi. Ilk daqiqalarda “Nasaf” hujumkor o‘yin bilan ustunlikka ega bo‘ldi. 13-daqiqada jamoa sardori Sharof Muhitdinov hisobni ochib, qarshiliklarga umid bag‘ishladi. Ammo bu quvonch uzoqqa cho‘zilmadi — oradan ikki daqiqa o‘tib, “Mash’al” yarimhimoyachisi Islom Sharipov o‘z jamoasiga tenglikni tikladi.
Birinchi bo‘lim yuqori sur’atda o‘tgan bo‘lsa-da, har ikki jamoa imkoniyatlaridan unumli foydalanolmadi. Ikkinchi taymda “Nasaf” jamoasi tashabbusni qo‘lga olishga harakat qildi, ammo mehmonlar himoyada ishonchli harakat qildi va tezkor qarshi hujumlar bilan xavf tug‘dirdi.
Bahsning hal qiluvchi lahzasi 82-daqiqada sodir bo‘ldi — Amin-u Umar “Mash’al”ni oldinga olib chiqdi va jamoasiga g‘alaba keltirgan golni kiritdi. Bu zarba nafaqat uch ochko, balki jamoaning Superligada qolish uchun bo‘lgan imkoniyatini ham kuchaytirdi.
Uchrashuvdan keyin “Nasaf”ning ochkolari 58 tada qolib ketdi va jamoa chempionlik poygasidagi asosiy raqibi “Neftchi”dan uch ochko orqada bormoqda. Endi qarshiliklarni 29-turda “Paxtakor” bilan juda muhim bellashuv kutmoqda.
“Mash’al” esa bu g‘alaba orqali ochkolarini 29 taga yetkazib, 12-pog‘onaga ko‘tarildi. Yigitlar bunday ruhda davom etsa, chempionat oxirida o‘z o‘rnini mustahkamlay oladi.
Superliga. 28-tur natijasi
“Nasaf” – “Mash’al” 1:2
Gollar: Sharof Muhitdinov (13’) — Islom Sharipov (15’), Amin-u Umar (82’).
Nasaf — 35. Abduvohid Ne’matov, 5. G‘olib G‘aybullayev ( 9. Javohir Sidiqov, 71), 8. Zafarmurod Abdirahmatov, 14. Sharof Muhitdinov, 18. Husayn Norchayev (2. Alibek Davronov, 60), 19. Stefan Cholovich (7. Adenis Shala,60), 22. Igor Golban, 24. Sardor Bahromov (10. Dragan Cheran,60), 34. Sherzod Nasrullayev, 77. Oybek Bozorov.
Mash’al — 35. Doston To‘xtaboyev, 5. Samandar Ochilov, 10. Humoyun Murtozayev (99. Nodirxon Xabibullayev,65) 13. Nuriddin Nuriddinov (57. Amin-u Umar, 46), 15. Muhammadali Aliqulov, 19. Islom Sharipov ( 8. Sardor Abduraimov, 75), 22. Nurjahon Muzaffarov, 24. Avazxon Mamatxo‘jayev (27. Zafarbek Akramov, 65), 28. Ergash Ismoilov, 37. Sherzod Fayziyev, 80. Dmitriy Yashin.
“Markaziy” stadionda kechgan bu bahs — Superliganing so‘nggi turlaridagi eng sensatsion natijalardan biri sifatida yodda qoladi. “Nasaf” endi chempionlik uchun faqat o‘z natijalariga emas, raqiblar xato qilishiga ham umid bog‘laydi.
“Zamin”ni Telegramʻda oʻqing!
