O‘zbekistonda ijtimoiy sug‘urta tizimi 2026-yil 1-yanvardan boshlab tubdan o‘zgaradi. Prezident tomonidan imzolangan yangi farmonga ko‘ra, “Davlat ijtimoiy sug‘urtasi bo‘yicha to‘lovlarni tayinlash va to‘lash tizimini takomillashtirishga oid chora-tadbirlar” belgilandi.
Yangi tartib asosida fuqarolarga homiladorlik, tug‘ish va mehnatga layoqatsizlik nafaqalari endilikda avtomatik — ya’ni ariza topshirishsiz tayinlanadi.
Davlat ijtimoiy sug‘urtasining yangi tizimi ikki shaklda ishlaydi:
– majburiy sug‘urta – davlat byudjetidan ajratiladigan daromad solig‘i hisobidan;
– ixtiyoriy sug‘urta – fuqarolarning har oy eng kam ish haqining 5 foiziga teng badal to‘lash orqali.
To‘lovlar Ijtimoiy himoya milliy agentligining Davlat ijtimoiy sug‘urta jamg‘armasi orqali amalga oshiriladi.
Yangi tizimga ko‘ra:
– 2026-yil 1-yanvardan homiladorlik va tug‘ish nafaqasi,
– 2026-yil 1-iyuldan vaqtinchalik mehnatga layoqatsizlik nafaqasi avtomatik tarzda tayinlanadi.
Bundan tashqari, 2030-yil 1-yanvardan boshlab ishdan bo‘shatish nafaqasi ham jamg‘arma orqali to‘lanadi.
Mazkur o‘zgarishlar fuqarolarning ijtimoiy himoyasini kuchaytirish, byurokratik to‘siqlarni kamaytirish va to‘lovlarni yanada tezkor qilishni maqsad qiladi.
“Zamin”ni Telegramʻda oʻqing!
