Joriy yilning eng yirik va yorqin astronomik hodisalaridan biri — super Oy — ertaga, 5-noyabr kuni osmonda namoyon bo‘ladi. Bu haqda Britaniyaning “The Guardian” nashri xabar tarqatdi.
Olimlar ma’lumotiga ko‘ra, bu kecha Oy Yerga eng yaqin nuqtaga — 357 ming kilometrdan ham yaqinroq masofaga keladi. Shu sababli u odatdagidan taxminan 8 foizga kattaroq va 16 foizga yorqinroq ko‘rinadi.
Mutaxassislar tushuntirishicha, “super Oy” deb, Oy Yer atrofidagi orbitasida eng yaqin nuqtada bo‘lgan holda to‘liq yoritilgan paytni aytiladi. Bu vaqtda uning ko‘rinishi oddiy to‘lin Oydan ancha ta’sirchan va go‘zal bo‘ladi.
Kuzatuvchilar uchun quvonchli xabar — bu manzarani dunyoning deyarli barcha nuqtalaridan, jumladan, O‘zbekiston osmonidan ham tomosha qilish mumkin bo‘ladi. Toshkentda Oy soat 21:50 atrofida ko‘tariladi. Astronomlar aytishicha, uning eng hayratlanarli ko‘rinishi aynan chiqish paytida kuzatiladi.
Bundan tashqari, bu joriy yildagi oxirgi super Oy hisoblanadi. Agar havo ochiq va tiniq bo‘lsa, hech qanday optik uskuna yordamisiz, faqat ko‘z bilan ham bu aniq va ravshan manzarani tomosha qilish mumkin bo‘ladi.
“Zamin”ni Telegramʻda oʻqing!
