Superliga 28-turidan o‘rin olgan markaziy bahs Toshkentdagi “Bunyodkor” va Samarqandning “Dinamo” jamoalari o‘rtasida bo‘lib o‘tdi. Qizg‘in kurash ostida kechgan uchrashuvda mehmonlar 3:1 hisobida zafar qozonib, muhim g‘alabani qo‘lga kiritishdi.
Bellashuvning ilk qismida “Bunyodkor” tashabbusni qo‘lga oldi va 42-daqiqada Imeda Ashortia jamoasini oldinga olib chiqdi. Ammo ko‘p o‘tmay, ikki daqiqa ichida Jahongir Abdusalomovning aniq zarbasi hisobni tenglashtirdi.
Ikkinchi bo‘limda “Dinamo” to‘liq ustunlikni qo‘lga kiritdi. 72-daqiqada Dmitriy Pletnyov uzoq masofadan yo‘llagan kuchli zarbasi bilan supergol urib, jamoasini oldinga olib chiqdi. Uchrashuvning 90+3-daqiqasida esa Firdavs Abdurahmonov hisobni yiriklashtirib, nuqtani qo‘ydi.
Bu g‘alaba “Dinamo” uchun juda muhim bo‘ldi — jamoa ochkolarini 53 taga yetkazib, Superliga jadvalida 4-pog‘onada mustahkam joy oldi. “Bunyodkor” esa 46 ochko bilan beshinchi o‘rinda qoldi.
Bellashuv davomida ikki jamoa ham faol va hujumkor futbol namoyish etdi, ammo samarqandliklar har bir vaziyatda yaxshiroq foydalana oldi.
Superliga | 28-tur natijasi:
“Bunyodkor” – “Dinamo” 1:3
Gollar: Ashortia (42’) — Abdusalomov (44’), Pletnyov (72’), Abdurahmonov (90+3’).
Bunyodkor: Abdujalilov, Mali, Normurodov, Ashortia, Abduxoliqov, Bugarin, Rahimjonov, Urata, Krivokapich, To‘lqunbekov, Olimjonov.
Dinamo: Nemanov, Ferreyra, Qodirqulov, Jumaboyev, Abdusalomov, Oblaqulov, O‘rmonjonov, Abdurahmonov, Pletnyov, Mahamadjonov, Stanoyevich.
Keyingi turda “Dinamo” o‘z maydonida “Qo‘qon-1912”ni qabul qiladi. Samarqandliklar uchun bu g‘alaba Superligadagi yuqori pog‘onalar uchun kurashni yanada qizitdi.
“Zamin”ni Telegramʻda oʻqing!
