AQSh O'zbekiston uchun savdo cheklovini bekor qiladi

AQSh Senatining Xalqaro munosabatlar qo'mitasi raisi Jeyms Rish Markaziy Osiyo davlatlari, jumladan, O'zbekiston Respublikasi uchun Jekson-Venik tuzatmasini bekor qilishni ko'zda tutuvchi qonun loyihasini Kongressga kiritish niyatida ekanligini e'lon qildi. Jekson-Venik tuzatmasi "Sovuq urush" davrining eng mashhur ramzlaridan biri hisoblanadi.

U 1974 yilda AQSh Savdo qonuni tarkibida qabul qilingan bo'lib, o'z fuqarolarining chet elga erkin chiqishiga to'sqinlik qilgan yoki inson huquqlarini buzgan davlatlarga nisbatan savdo cheklovlarini joriy etishni nazarda tutgan. Ushbu chora dastlab Sovet Ittifoqiga qarshi qaratilgan edi.

SSSR parchalanganidan so'ng, ushbu qonun amaliy ahamiyatini yo'qotdi, biroq formal jihatdan sobiq sovet davlatlarining bir qatoriga nisbatan hali ham amal qilib kelmoqda. Shu kungacha AQSh prezidenti har yili ushbu tuzatmaning ta'sirini vaqtinchalik to'xtatib turuvchi maxsus hujjatni imzolab, mintaqa davlatlariga, jumladan, O'zbekistonga AQSh bilan odatiy tartibda savdo qilish imkonini yaratgan.

Bu amaliyotning bekor qilinishi bir muhim ijobiy natijani beradi: investorlar "istisno muddati uzaytirilmasligi" xavfini hisobga olmaydi, bu esa biznes muhitini barqaror va oldindan bashorat qilish imkoniyatiga ega qiladi. Shu tariqa, Vashington Markaziy Osiyo davlatlari bilan o'zaro munosabatlarni yangilash yo'lida yana bir qadam tashlamoqda va sovuq urush merosini ortda qoldirmoqda.

“Zamin”ni Telegramʻda oʻqing!